საქართველოში უახლოეს დღეებში თოვლიანი და რთული მეტეოროლოგიური პირობებია მოსალოდნელი

გარემოს ეროვნული სააგენტო უახლოეს დღეებში საქართველოში მოსალოდნელი ამინდის შესახებ ინფორმაციას ავრცელებს.

მეტეოროლოგების პროგნოზით, 13 იანვარს ქვეყნის ტერიტორიაზე მოსალოდნელია დროგამოშვებით ნალექი, ზოგან ძლიერი. მთიან რაიონებში ნალექი თოვლის სახით იქნება.

14 იანვარს კი საქართველოს უმეტეს ნაწილში პროგნოზირებულია თოვა, ზოგან ძლიერი, დასავლეთის მიმართულებით ძლიერი ქარი, ხოლო ზღვაზე მოსალოდნელია 4-5-ბალიანი შტორმი.

გარემოს ეროვნული სააგენტოს ინფორმაციით, მთიან და მაღალმთიან რაიონებში მოსალოდნელია ნისლი, ქარბუქი, ელექტროგადამცემ ხაზებზე შემოყინულობა, გზებზე ლიპყინული და ზვავსაშიშროება.

სააგენტოს განმარტებით, დიდთოვლობის, ქარბუქის, ხილვადობის გაუარესებისა და ლიპყინულის გამო, საავტომობილო გზების ცალკეულ მონაკვეთებზე შესაძლებელია ტრანსპორტის მოძრაობის შეზღუდვა.

ამასთან, მოსალოდნელმა ნალექებმა შესაძლოა დასავლეთ საქართველოს მდინარეებზე წყლის დონეების მატება გამოიწვიოს, ხოლო გორაკ-ბორცვიან და მთიან ზონებში მეწყრული და ღვარცოფული პროცესების ჩასახვა-გააქტიურება გამოიწვიოს. საფრთხის დონე შეფასებულია, როგორც საშუალო.