რადიო „თავისუფლების“ ინფორმაციით, ატლანტის ოკეანეში აშშ-ის მიერ 7 იანვარს დაკავებული ტანკერ BELLA 1-ის (Marinera) კაპიტანი საქართველოს მოქალაქე, ბათუმელი მეზღვაური ავთანდილ კალანდაძეა. როგორც მედიას მეზღვაურებმა დაუდასტურეს, ეკიპაჟის შემადგენლობაში შესაძლოა კიდევ ხუთი ქართველი იმყოფებოდეს.
მედია წერს, რომ 7 იანვარს აშშ-ის ოფიციალურმა პირებმა განაცხადეს ტანკერის ეკიპაჟის წევრების სისხლის სამართლის წესით გასამართლების გეგმის შესახებ. მათ ბრალად ედებათ სანქცირებული ტანკერით სანქცირებული ნავთობის გადაზიდვა. ამ ეტაპზე დაუზუსტებელია, რა ფაზაშია გამოძიება და როდის გაიმართება სასამართლო პროცესი.
9 იანვარს რუსეთის საგარეო საქმეთა სამინისტრომ განაცხადა, რომ მოსკოვის მიმართვის საფუძველზე აშშ-ის პრეზიდენტმა ტანკერის ეკიპაჟის ორი რუსი წევრი გაათავისუფლა, რომლებიც უახლოეს პერიოდში სამშობლოში დაბრუნდებიან.
რაც შეეხება საქართველოს მოქალაქეებს, მათი მდგომარეობისა და შესაძლო გათავისუფლების შესახებ ინფორმაცია ამ დრომდე არ ვრცელდება. მედიამ პასუხები ვერც საქართველოს ოფიციალური უწყებებისგან მიიღო.
