„ქართული ოცნების“ ჯანდაცვის სამინისტრო სოციალურად დაუცველი ოჯახების მონაცემთა ერთიან ბაზაში რეგისტრირებული ოჯახების გადამოწმების პროცესს იწყებს. ამის შესახებ ჯანდაცვის მინისტრმა მიხეილ სარჯველაძე ბრიფინგზე განაცხადა.
მინისტრის ინფორმაციით, ამ ეტაპზე სოციალური შემწეობის მიმღები ოჯახების რაოდენობა 185 ათასს აღემატება, ხოლო მათი წევრების საერთო რაოდენობა დაახლოებით 710 ათასია. ამასთან, მონაცემთა ერთიან ბაზაში სულ რეგისტრირებულია დაახლოებით 400 ათასი ოჯახი, რაც ჯამში 1 მილიონ 300 ათასამდე პირს მოიცავს. აქედან ნახევარზე მეტი ფინანსურ შემწეობას არ იღებს, თუმცა სხვადასხვა სოციალური შეღავათით სარგებლობს.
მიხეილ სარჯველაძის განცხადებით, სოციალურად დაუცველთა ბაზა წლების განმავლობაში არაერთი პოლიტიკური სპეკულაციის საგანი იყო. მისი თქმით, 2012 წლის შემდეგ, სოციალური მხარდაჭერის გასაფართოებლად, ორჯერ გაიზარდა ის ქულის ზღვარი, რომელიც შემწეობის მიღებას განსაზღვრავს. შედეგად, სახელმწიფოს დახმარებას დღეს უფრო მეტი ოჯახი იღებს, ვიდრე იმ შემთხვევაში იქნებოდა, ქულა უცვლელი რომ დარჩენილიყო.
მინისტრმა ყურადღება გაამახვილა იმ გარემოებაზეც, რომ კოვიდპანდემიის შემდეგ მოქმედებდა ე.წ. მორატორიუმი და ოჯახების გადამოწმება პრაქტიკულად არ ხორციელდებოდა. ამის გამო, ბაზაში დღემდე რჩებიან ოჯახები, რომელთაც უკვე აღარ აქვთ სოციალური დახმარების ობიექტური საჭიროება. სარჯველაძემ კონკრეტული მაგალითებიც მოიყვანა, როდესაც ბაზაში რეგისტრირებული ოჯახები ფლობენ ძვირადღირებულ ავტომობილებს, იღებენ მაღალ შემოსავალს ან სარგებლობენ მსხვილი საბანკო სესხებით.
მისი თქმით, გადამოწმების მიზანია, ბაზაში დარჩნენ მხოლოდ ის ოჯახები და პირები, რომლებიც რეალურად აკმაყოფილებენ მოქმედი კანონმდებლობით განსაზღვრულ კრიტერიუმებს და საჭიროებენ სახელმწიფოს ფინანსურ მხარდაჭერას. პროცესი, მინისტრის განმარტებით, წარიმართება მკაცრი კონტროლის პირობებში და მოითხოვს ხანგრძლივ, სკრუპულოზურ მუშაობას.
გადამოწმება მომდევნო თვეებში ეტაპობრივად განხორციელდება. პრიორიტეტულად შემოწმდებიან ის ოჯახები, რომელთა შემთხვევაში არსებობს მაღალი ალბათობა, რომ ისინი აღარ აკმაყოფილებენ სოციალური შემწეობის მიღების პირობებს. ერთ-ერთ ასეთ ინდიკატორად განისაზღვრება უკანასკნელი სამი თვის განმავლობაში ყოველთვიურად მინიმუმ 2000 ლარის შემოსავლის მიღება.
