“ურთულესი და საგანგაშო მდგომარეობაა მაღალმთიან აჭარაში, სტიქიამ უსახლკაროდ დატოვა ათობით ოჯახი, დაზიანებულია გზები და ინფრასტრუქტურა, ამის შესახებ დღეს, ბრიფინგზე “ნაციონალური მოძრაობის” წევრებმა განაცხადეს. მათი თქმით, არარსებობს განსახლებისა და სტიქიაზე რეაგირების სამოქმედო გეგმა.
ოპოზიცია ადგილობრივ ხელისუფლებას უყურადღებობაში ადანაშაულებს. მათი ინფორმაციით, ადამიანებს ცხოვრების გაგრძელება ისევ, სარისკო ზონებში უწევთ და მათი განსახლება ჭიანურდება.
“სხალთაში მთის ფერდობის ჩამოშლის შედეგად დაგუბებულია მდინარე და შეიძლება ნებისმიერ დროს მოხდეს სწრაფი დაცლა, რაც გამოიწვევს ნგრევასა და ეროზიას. სოფელ გელაძეებში ჩამოშლილია მთა, რის გამოც სამ სოფელში (გელაძეებში, პაქსაძეებსა და კორტოხში) მაცხოვრებელთა ნაწილი ჩარჩენილია და ისინი ვერ გამოდიან სტიქიის ზონიდან,” – ამბობს გია აბულაძე, აჭარის უმაღლესი საბჭოს დეპუტატი.
“ნაციონალური მოძრაობა” ხელისუფლებას მიმართავს და ითხოვს:
- მოვითოვთ დაუყოვნებლივ რეაგირებას, რადგან მოსალოდნელი ნალექის და ბუნებრივი პირიბების გათვალისწინებით შესაძლოა მეწყრული პროცესები უფრო გააქტიურდეს, რაც საფრთხეს უქმნის ხულოს, შუახევისა და ქედის მოსახლეობას;
- დაუყოვმნებლივ, გარემოს ეროვნულ სააგენტოსთან და ესპერტებთან ერთად სწრაფად მოხდეს საფრთხეების შეფასება;
- გასაჯაროვდეს ყველა დასკვნა და რეკომენდაცია, შემუშავდეს კრიზისის მართვის გეგმა;
- უსახლკაროდ დარჩენილ ათობით ოჯახისათვის დაუყოვნებლივ გამოიყოს დროებითი საცხოვრისი და თანხები მათთვის საცხოვრებელი სახლის შესაძენად;
- მობილიზებული იქნას ტექნიკა, დროულად მოხდეს გზების გაწმენდა და ინფრასტრუქტურის აღდგენა;
“ხელისუფლება შოკიდან ჯერ კიდევ არაა გამოსული, მოსახლეობა დღემდე მიტოვებულია. ადამიანთა ნაწილი ისევ მეწყერსაშიშ ზონაშია, მათ შორის პირუტყვიც. ჩემი აზრით, შეფერხების მიზეზი მთავრობის გამოუცდელობაა. არაერთმა სტიქიამ აჩვენა, რომ ხელისუფლება კრიზისულ სიტუაციას ვერ უმკლავდება სათანადოდ,” – განაცხადა ბრიფინგზე “ნაციონალური მოძრაობის” წევრმა ირაკლი ჯორბენაძემ.
