ჟურნალისტი და ონლაინ გამოცემა „აჭარა თაიმსის“ დირექტორი სულხან მესხიძე აცხადებს, რომ სოციალურ ქსელში მის მიმართ მუქარისა და შეურაცხმყოფელი შინაარსის შეტყობინება მიიღო, სადაც უხეშად მოიხსენიეს მისი ოჯახის წევრებიც.
როგორც მესხიძე განმარტავს, შეტყობინების სქრინშოთის გამოქვეყნებას შეგნებულად არ აპირებს, რადგან ის შეიცავს უცენზურო გამოთქმებს, პირად შეურაცხყოფასა და აშკარა მუქარას.
მისივე თქმით, ეს პირველი შემთხვევა არ არის. ჟურნალისტი ამბობს, რომ წინა ანალოგიურ ფაქტებზე პოლიციას, სპეციალურ საგამოძიებო სამსახურსა და გენერალურ პროკურატურას არაერთხელ მიმართა, თუმცა პასუხი დღემდე არ მიუღია.
„მიუხედავად ზეწოლისა და მუქარების, ჩემს საქმეს გავაგრძელებ. ვთვლი, რომ ასეთი აგრესია პირდაპირი შედეგია იმ პოლიტიკური და მორალური ატმოსფეროსი, რომელსაც “ქართული ოცნება” ქმნის ქვეყანაში – გარემოსი, სადაც ჟურნალისტის დევნა და დამცირება ყოველდღიურ რეალობად იქცა,“ – აცხადებს სულხან მესხიძე.
ჟურნალისტის შეფასებით, არსებული ვითარების პასუხისმგებლობა მმართველ პარტიას და მის პოლიტიკას ეკისრება, რომელმაც, მისი თქმით, „საზოგადოებაში შიშისა და სიძულვილის კულტურას ჩაუყარა საფუძველი.“
