შეფასებისა და ეროვნული გამოცდების ხელმძღვანელი სოფო გორგაძე 1-ლი იანვრიდან თანამდებობას ტოვებს. ამის შესახებ ინფორმაცია „The Ajara Times”-ს განათლების უწყებაშიც დაუდასტურეს.
როგორც, ჩვენს სააგენტოს განუცხადეს, სოფო გორგაძემ განცხადება რამდენიმე დღის წინ დაწერა და ამის შესახებ სურვილი თავად გამოთქვა.
უკავშირდება თუ არა სოფო გორგაძის თანამდებობის დატოვება PISA-ს კველვებს?
ამ კითხვაზე პასუხს შეფასებისა და ეროვნული გამოცდების ცენტრის გარდა, თავად სოფო გორგაძეც პასუხობს.
როგორც გორგოძე აღნიშნავს, გადაწყვეტილება რამდენიმე თვის წინ მიიღო და ამას ცენტრის საქმიანობასთან კავშირი არ აქვს.
„შეფასებისა და გამოცდების ეროვნულ ცენტრში ჩემი მუშაობიდან უკვე 5 წელი გავიდა. ეს გახლდათ არაჩვეულებრივი გამოცდილება და ძალიან საინტერესო პერიოდი ჩემს ცხოვრებაში. ამ ეტაპზე მივიღე გადაწყვეტილება, რომ 1-ელი იანვრიდან, პირადი განცხადების საფუძველზე, დავტოვო შეფასებისა და გამოცდების ეროვნული ცენტრის დირექტორის თანამდებობა.
აქვე ხაზგასმით მინდა აღვნიშნო, რომ ეს გადაწყვეტილება რამდენიმე თვის წინ მქონდა მიღებული და მას არავითარი კავშირი არ აქვს ცენტრის საქმიანობასთან.
მინდა, დიდი მადლობა გადავუხადო ცენტრის თითოეულ თანამშრომელს ნაყოფიერი და წარმატებული მუშაობისთვის, მინისტრსა და მინისტრის მოადგილეებს კი მხარდაჭერისთვის და ჩემს საქმიანობაში მაქსიმალური ხელშეწყობისთვის.
ყოველთვის ვიქნები შეფასებისა და გამოცდების ეროვნული ცენტრის დიდი გულშემატკივარი. მცირე შესვენების შემდეგ კვლავ გავაგრძელებ აქტიურ საქმიანობას განათლების სფეროში“, – აცხადებს სოფო გორგოძე.
