„ქართული ოცნების“ შინაგან საქმეთა სამინისტროს ინფორმაციით, ქვეყნის მასშტაბით რადიკალური ფაშისტური იდეოლოგიის მქონე ძალადობრივი დაჯგუფების 16 წევრი დააკავეს. დაკავებულთაგან 10 არასრულწლოვანია.
უწყების ცნობით, გამოძიებამ დაადგინა, რომ დაჯგუფებების წევრები თავს ნეონაცისტებად მოიხსენიებდნენ და ფაშისტური იდეოლოგიით ხელმძღვანელობდნენ. გავლენების გაზრდისა და ცნობადობის მოპოვების მიზნით, ისინი სხვადასხვა ასაკის პირებზე ფიზიკურ და ფსიქოლოგიურ ძალადობას ახორციელებდნენ, მათ შორის იმ ადამიანებზე, რომლებიც აღნიშნულ იდეოლოგიას არ ეთანხმებოდნენ.
თბილისის პოლიციის დეპარტამენტის დირექტორის, ვაჟა სირაძის განცხადებით, ძალადობრივი ქმედებები განსაკუთრებული სისასტიკით ხორციელდებოდა, ხოლო პროცესის ამსახველ ფოტო-ვიდეო მასალას ბრალდებულები მობილური ტელეფონებით იღებდნენ და სხვადასხვა ინტერნეტ პლატფორმაზე ავრცელებდნენ. შედეგად, დაზარალებულია ათზე მეტი პირი, მათ შორის ოთხი არასრულწლოვანი.
სამართალდამცველებმა ბრალდებულების პირადი და საცხოვრებელი სახლების ჩხრეკისას ამოიღეს მობილური ტელეფონები, ნიღბები, სხვადასხვა ელექტრონული მოწყობილობა, ნაცისტური სიმბოლიკის შემცველი ნივთები, ასევე ხმოვანი და ცივი იარაღები.
შსს ასევე აღნიშნავს, რომ აღნიშნული იდეოლოგიის ორი ლიდერი – ლევან აბესაძე და დავით ჯაფაროვი – ანალოგიური ბრალდებით უკვე იხდიან სასჯელს პენიტენციურ დაწესებულებაში. მათთან ერთად, რამდენიმე თვის წინ, დაკავებული იყო დაჯგუფების კიდევ შვიდი წევრი. გამოძიების ფარგლებში დადგინდა, რომ დანარჩენი წევრები ძალადობრივ ქმედებებს აგრძელებდნენ, რაც საქმეზე მოპოვებული მტკიცებულებებით დასტურდება.
მომხდარ ფაქტებზე გამოძიება მიმდინარეობს სისხლის სამართლის კოდექსის 144-ე პრიმა მუხლის მეორე ნაწილის „ზ“ ქვეპუნქტით და მესამე ნაწილის „ბ“ ქვეპუნქტებით, რაც წინასწარი შეცნობით არასრულწლოვნის მიმართ ჯგუფურად ჩადენილ არაადამიანურ მოპყრობას გულისხმობს და 10 წლამდე ვადით თავისუფლების აღკვეთას ითვალისწინებს.
