შინაგან საქმეთა სამინისტროს ინფორმაციით, თურქეთის რესპუბლიკის მიერ საერთაშორისო დონეზე ძებნილი, 2000 წელს დაბადებული ე.ბ. დააკავეს. უწყების ცნობით, აღნიშნული პირი თურქეთის რესპუბლიკის სამართალდამცავი ორგანოების მოთხოვნის საფუძველზე, სხვადასხვა მძიმე დანაშაულის ჩადენისთვის იძებნებოდა.
პოლიციამ ე.ბ.-ის დროებითი საცხოვრებელი სახლის ჩხრეკა ხელვაჩაურის მუნიციპალიტეტში ჩაატარა, რა დროსაც ნივთმტკიცებად ამოიღეს უკანონო ცეცხლსასროლი იარაღი და საბრძოლო მასალა.
ფაქტთან დაკავშირებით გამოძიება საქართველოს სისხლის სამართლის კოდექსის 236-ე მუხლის მე-3 და მე-4 ნაწილებით მიმდინარეობს, რაც შვიდ წლამდე ვადით თავისუფლების აღკვეთას ითვალისწინებს. დაკავებული ამ ეტაპზე პენიტენციურ დაწესებულებაშია მოთავსებული.
