საქართველოს სახელმწიფო უსაფრთხოების სამსახურის ინფორმაციით, კონტრდაზვერვის დეპარტამენტმა ჯაშუშობის ბრალდებით საქართველოს ერთი მოქალაქე დააკავა, ხოლო ანალოგიურ დანაშაულში კიდევ ორი პირია მხილებული.
უწყების განცხადებით, გამოძიებით დადგენილია, რომ დაკავებული პირი უცხო ქვეყნის სპეცსამსახურმა გადაიბირა და მას ფსევდონიმიც მიანიჭა. სუს-ის ცნობით, გარკვეული თანხის სანაცვლოდ, იგი საქართველოს ინტერესების საწინააღმდეგოდ აგროვებდა სხვადასხვა სახის ინფორმაციას და უცხო ქვეყნის სპეცსამსახურს გადასცემდა.
გამოძიების მიხედვით, ბრალდებულს დავალებული ჰქონდა ინფორმაციის მოპოვება საქართველოს სამართალდამცავი უწყებების – სახელმწიფო უსაფრთხოების სამსახურის, შინაგან საქმეთა სამინისტროსა და თავდაცვის სამინისტროს – დისლოკაციის ადგილების, ძალებისა და საშუალებების შესახებ. ასევე, იგი აგროვებდა მონაცემებს სტრატეგიული მნიშვნელობის ობიექტებზე, მათ შორის ხიდებზე, საავტომობილო და სარკინიგზო მაგისტრალებზე და ახორციელებდა აღნიშნული ლოკაციების ფოტო და ვიდეო გადაღებას.
სახელმწიფო უსაფრთხოების სამსახური არ აკონკრეტებს, რომელი ქვეყნის სპეცსამსახურის სასარგებლოდ ხორციელდებოდა სავარაუდო ჯაშუშური საქმიანობა.
