თბილისის საქალაქო სასამართლოში ირაკლი ღარიბაშვილის სასამართლო პროცესი მიმდინარეობს. პროცესის დასრულებამდე საქართველოს პროკურატურამ განცხადება გაავრცელა, რომლის მიხედვითაც ყოფილ პრემიერ-მინისტრთან საპროცესო შეთანხმება გაფორმდა.
პროკურატურის ინფორმაციით, ირაკლი ღარიბაშვილს ბრალად ედებოდა საქართველოს სისხლის სამართლის კოდექსის 194-ე მუხლის მესამე ნაწილით გათვალისწინებული დანაშაული. საპროცესო შეთანხმების თანახმად, მას სასჯელის სახედ და ზომად 5 წლით თავისუფლების აღკვეთა განესაზღვრა.
ამავე შეთანხმების ფარგლებში, დამატებითი სასჯელის სახით, ირაკლი ღარიბაშვილს დაეკისრა ჯარიმა 1 მილიონი ლარის ოდენობით. ასევე, სახელმწიფოს სასარგებლოდ ჩამოერთმევა დანაშაულებრივი საქმიანობის შედეგად მიღებული თანხა, რომელიც მისი საცხოვრებელი სახლის ჩხრეკის დროს იქნა ამოღებული.
პროკურატურის განცხადებაში აღნიშნულია, რომ ირაკლი ღარიბაშვილი აღიარებს ჩადენილ დანაშაულს და ეთანხმება საპროცესო შეთანხმების პირობებს. უწყებისვე ინფორმაციით, სასამართლომ პროკურატურის შუამდგომლობა საპროცესო შეთანხმების დამტკიცების თაობაზე უკვე დააკმაყოფილა.
