შინაგან საქმეთა სამინისტროს ინფორმაციით, ბათუმში განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ბრალდებით ორი პირი დააკავეს. დაკავებულები არიან აზერბაიჯანის რესპუბლიკის მოქალაქე, 1993 წელს დაბადებული ნ.ა. და თურქეთის რესპუბლიკის მოქალაქე, 1993 წელს დაბადებული შ.ჩ.
პოლიციის მიერ ჩატარებული ჩხრეკის შედეგად, მათი პირადი და დროებითი საცხოვრებელი სახლებიდან განსაკუთრებით დიდი ოდენობით ნარკოტიკული საშუალება „ჰეროინი“ ნივთმტკიცებად ამოიღეს. ასევე ამოღებულია ნარკოტიკული საშუალების დაფასოებისთვის საჭირო მასალები.
გამოძიებით დადგინდა, რომ ბრალდებულები ნარკოტიკულ საშუალებას აფასოებდნენ და რეალიზაციის მიზნით ბათუმის სხვადასხვა ადგილზე ათავსებდნენ. გამოძიება შინაგან საქმეთა სამინისტროს მიერ სისხლის სამართლის კოდექსის 260-ე მუხლის მე-3 ნაწილისა და 260-ე კვარტა მუხლის „ა“ ქვეპუნქტებით მიმდინარეობს. აღნიშნული დანაშაული 20 წლამდე ან უვადო თავისუფლების აღკვეთას ითვალისწინებს.
