“ღმერთმა დიდხანს გვაცოცხლოს და 100 წლის განმავლობაში არ დაგვჭირვებოდეს სასაფლაო” – ასე უპასუხა კითხვას აჭარის უმაღლესი საბჭოს საფინანსო-საბიუჯეტო და ეკონომიკურ საკითხთა კომიტეტის წევრმა, რომელსაც ხაახლოებით, 10 წლის წინ დაწყებული სასაფლაოს მშენებლობის შესახებ ვკითხეთ. მოკლე კომენტარის შემდეგ ტიტე აროშიძემ ჩვენთან ინტერვიუ შეწყვიტა და კაბინეტში შეიკეტა.
უმაღლესი საბჭოს დეპუტატმა ასევე, უპასუხოდ დატოვა კითხვა რა ეტაპზეა გამოძიება, რომლის შესახებაც საზოგადოებას ამ დრომდე ინფორმაცია არ გააჩნია. კითხვებს ბათუმის მერიაშიც არ პასუხობენ.
ცნობისთვის: არაერთი საჯარო დაპირების მიუხედავად, ბათუმში ახალი სასაფლაოს გახსნა ამ დრომდე ვერ ხერხდება. თითქმის ათი წელია თვითმმართველი ქალაქის მერია სამუშაოების დასრულებას აანონსებს, თუმცა შედეგი არ ჩანს. თავდაპირველი დათქმით, პროექტი 2017 წელამდე უნდა დასრულებულიყო.
ჩაქვში მდებარე 177 073 კვ.მ ტერიტორიაზე სასაფლაოების მოწყობისთვის თავდაპირველად 3 მილიონ ლარზე მეტი გამოიყო, თუმცა ხელშეკრულებაში ცვლილება რამდენჯერმე შევიდა, მათ შორის გაიზარდა თანხის მოცულობაც.
ერთ-ერთი ვერსიით, სასაფლაოს გახსნის პროცესს ტერიტორიის გეოლოგიურად არამდგრადობა აფერხებს. 2019 წელს „ბათუმის სასაფლაოების“ ხელმძღვანელმა თქვა, რომ მიწა უნდა “დაჯდეს”, რასაც მისი ვარაუდით დაახლოებით ორი წელი სჭირდებოდა. ამ ვადის გასვლის შემდეგაც მწვავე საკითხი, რომელიც ქალაქისთვის ბევრი გარემოების გამო მნიშვნელოვანია მერიამ ისევ მიივიწყა.
რაში დაიხარჯა მილიონები – ახალი სასაფლაოს მშენებლობის საქმეს აჭარის პროკურატურა წლებია იძიებს.
სახელმწიფო აუდიტის დასკვნის თანახმად, 3 მილიონ ლარზე მეტი ღირებულების ინფრასტრუქტურული პროექტი, ხარვეზებით შესრულდა.
აღსანიშნავია ის ფაქტი, რომ ქალაქში არსებული სასაფლაოზე ადამიანის დაკრძალვისთვის საჭირო ტერიტორია წლებია აღარ არის. მოქალაქეებს კი კერძო ტერიტორიების შესყიდვა დიდი თანხის სანაცვლოდ უწევთ. გარდა ამისა, პროცესი იმდენად ქაოტურია ხალხი საფლავს იქ აკეთებს, სადაც მას მოესურვება, მათ შორის დასახლებული პუნქტიდან რამდენიმე მეტრში.
