საქართველოში 2025 წლის პირველ ცხრა თვეში მედიის წარმომადგენლების წინააღმდეგ ძალადობის, მუქარისა და სამართლებრივი ზეწოლის 180-ზე მეტი შემთხვევა დაფიქსირდა — ამის შესახებ ნათქვამია ორგანიზაცია „საერთაშორისო გამჭვირვალობა – საქართველოს“ ახალ ანგარიშში.
ორგანიზაციის განცხადებით, ბოლო პერიოდში მედიაზე ზეწოლა უფრო სისტემურ ხასიათს იძენს და მოიცავს როგორც სამართლებრივ, ისე ადმინისტრაციულ მეთოდებს. კვლევის მიხედვით, კრიტიკულად განწყობილი ჟურნალისტები და დამოუკიდებელი მედიასაშუალებები ხელისუფლების მხრიდან ხშირად ხდებიან მიზანმიმართული ზეწოლის, სასამართლო დევნისა და ფინანსური ბარიერების მსხვერპლი.
ანგარიშში ნათქვამია, რომ რეგიონულ მედიაში ვითარება განსაკუთრებით მძიმეა. როგორც ორგანიზაცია აღნიშნავს, რეგიონებში მომუშავე ჟურნალისტები ხშირად აწყდებიან ინფორმაციის ხელმისაწვდომობის შეზღუდვასა და ადგილობრივი ხელისუფლების მხრიდან ზეწოლას. ამ კონტექსტში მოხსენიებულია ონლაინმედიის, „აჭარა თაიმსის“ დამფუძნებელი და დირექტორი, ჟურნალისტი სულხან მესხიძე, რომლის მიმართაც არაერთი შემთხვევა დაფიქსირდა ადმინისტრაციული ზეწოლისა და გამოძიების საგნად ქცეული თემების გამო.
ანგარიშის მიხედვით, 2025 წელს რამდენიმე დამოუკიდებელმა ტელევიზიამ მაუწყებლობა სრულად შეწყვიტა. „რეგიონულ მაუწყებელთა ალიანსის“ ინფორმაციით, 21 რეგიონული ტელევიზიიდან მხოლოდ ოთხი აგრძელებს საინფორმაციო გამოშვებების წარმოებას, რაც ფინანსურ სირთულეებთან და მაუწყებლობის რეგულაციების გამკაცრებასთან არის დაკავშირებული.
„საერთაშორისო გამჭვირვალობა – საქართველო“ განსაკუთრებულად გამოყოფს მზია ამაღლობლის, ონლაინგამოცემების „ბათუმელებისა“ და „ნეტგაზეთის“ დამფუძნებლის, დაკავებასა და ორწლიან პატიმრობას, რაც ორგანიზაციის შეფასებით, ხელისუფლების მხრიდან კრიტიკული მედიის წინააღმდეგ მიმართული რეპრესიული ნაბიჯია.
დოკუმენტში აღწერილია ფიზიკური ძალადობის შემთხვევებიც. ერთ-ერთი ყველაზე მძიმე ინციდენტი 8 სექტემბერს მოხდა, თბილისის მერობის კანდიდატის კახა კალაძის საარჩევნო შტაბთან, სადაც ოპოზიციის მხარდამჭერებზე თავდასხმისას დაშავდა შვიდი ჟურნალისტი. მათ შორის, პოლიციელის მხრიდან ფიზიკური შეურაცხყოფა მიაყენეს „ნეტგაზეთის“ ჟურნალისტ ქეთევან ხუციშვილს.
ორგანიზაცია აღნიშნავს, რომ ხელისუფლების წარმომადგენელთა განცხადებები ხშირად შეიცავს ჟურნალისტების დისკრედიტაციის ტონს და მიზნად ისახავს კრიტიკული მედიისადმი ნდობის შერყევას.
„საერთაშორისო გამჭვირვალობა – საქართველო“ ასკვნის, რომ მედიაგარემო ქვეყანაში სულ უფრო მეტად ხდება კონტროლის ქვეშ მოქცეული, ხოლო ჟურნალისტები მუშაობენ ზეწოლის, დაშინებისა და ფინანსური გაურკვევლობის პირობებში.
