საქართველოს პროკურატურამ 4 ოქტომბრის მოვლენებთან დაკავშირებით, სტრატეგიული და განსაკუთრებული მნიშვნელობის მქონე ობიექტის ჯგუფურად ხელში ჩაგდების მცდელობის, ასევე ჯგუფური ძალადობის ორგანიზებისა და მასში მონაწილეობის ფაქტებზე, კიდევ 13 პირს ბრალდება წარუდგინა. მათ შორისაა ბათუმში პროევროპული მშვიდობიანი აქციების აქტიური მონაწილე, მედროშე ზურაბ ჭავჭანიძე.
შინაგან საქმეთა სამინისტროს მტკიცებით, ზურაბ ჭავჭანიძემ და სხვა ბრალდებულებმა — ვლადიმერ გველესიანმა, ნიკა გვენცაძემ, მამუკა ლაბუჩიძემ, გოჩა ყატაშვილმა, გურიელ ქარდავამ, კონსტანტინე კოკაიამ, სულხან აბრალავამ, ბექა ქელეხსაშვილმა და გიორგი კირვალიძემ — ჯგუფური ძალადობის უკვე დაკავებული ორგანიზატორების მოწოდების შესაბამისად, იერიში მიიტანეს საქართველოს პრეზიდენტის ადმინისტრაციის შენობაზე.
გამოძიების მტკიცებით, ბრალდებულებმა ფიზიკური ზემოქმედებით დააზიანეს შენობის დამცავი ღობე და ეზოში შეიჭრნენ. სამართალდამცავების წინააღმდეგ, როგორც პროკურატურაში აცხადებენ, ისინი იყენებდნენ რკინის კონსტრუქციებსა და სხვადასხვა საგნებს, აყენებდნენ ფიზიკურ და სიტყვიერ შეურაცხყოფას და ქმნიდნენ საფრთხეს მათი სიცოცხლისა და ჯანმრთელობისთვის.
პროკურატურის განცხადებით, ზურაბ ჭავჭანიძეს და დანარჩენ 9 ბრალდებულს ბრალდება წარედგინა საქართველოს სისხლის სამართლის კოდექსის 19-222-ე მუხლის მე-2 ნაწილის “ა” ქვეპუნქტით (სტრატეგიული ობიექტის ჯგუფურად ხელში ჩაგდების მცდელობა) და 225-ე მუხლის მეორე ნაწილით (ჯგუფურ ძალადობაში მონაწილეობა), რაც სასჯელის სახედ ექვს წლამდე თავისუფლების აღკვეთას ითვალისწინებს.
