სახელმწიფო უსაფრთხოების სამსახურის განცხადებით, აჭარაში ტერორისტულ საქმიანობაში დახმარების ფაქტზე საქართველოს სამი მოქალაქე დააკავეს.
უწყების ინფორმაციით, დაკავებულები „ისლამური სახელმწიფოს“ გავლენიან წევრებთან თანამშრომლობდნენ და საქართველოში მათი არალეგალური შემოყვანის ორგანიზებას ცდილობდნენ. გამოძიების ვერსიით, ისინი ISIS-ის ლიდერების მითითებით რადიკალურ ისლამისტურ იდეოლოგიაზე დაფუძნებული ჯგუფის – ე.წ. თექბირისტების ჯამაათის – წევრები იყვნენ და ქვეყანაში ტერორისტული პლაცდარმის შექმნას გეგმავდნენ.
„დაკავებულები ცდილობდნენ, უზრუნველეყოთ უცხოელი ტერორისტების არალეგალური შემოსვლა, მათი დაფინანსება, დაბინავება და ტრანზიტული გადაადგილება საქართველოს ტერიტორიაზე. ამასთან, გამოძიებით დადგინდა, რომ ჯგუფის წევრები გამოირჩეოდნენ აგრესიით სხვა რელიგიის მიმდევრების მიმართ და გეგმავდნენ კონკრეტულ ტერორისტულ აქტივობებს“, – განაცხადეს სუს-ში.
უწყების ინფორმაციით, კონტრ-ტერორისტული ცენტრის მიერ ჩატარებული სპეციალური ღონისძიება ერთდროულად ხუთ სხვადასხვა ადგილას განხორციელდა. შედეგად, ამოღებულია ტერორისტული სიმბოლიკის მქონე ნივთები, ასაფეთებელი მასალები, დიდი ოდენობით საბრძოლო მასალა და ცეცხლსასროლი იარაღები, სამხედრო აღჭურვილობა, მობილური ტელეფონები და სხვადასხვა ვალუტის ფულადი თანხა.
გამოძიება საქართველოს სისხლის სამართლის კოდექსის 236-ე და 328-ე მუხლებით მიმდინარეობს, რაც ცეცხლსასროლი იარაღის მართლსაწინააღმდეგო შეძენა-შენახვას, უცხო ქვეყნის ტერორისტულ ორგანიზაციაში გაერთიანებასა და ტერორისტულ საქმიანობაში დახმარებას გულისხმობს. დანაშაული 17 წლამდე თავისუფლების აღკვეთას ითვალისწინებს.
