ბათუმში, ხიმშიაშვილის ქუჩის 13 ნომერში მცხოვრები მოქალაქე ინგა კოვზირიძე აცხადებს, რომ კომპანია „სოკარ ჯორჯია გაზი აჭარამ“ იგი უსაფუძვლოდ დააჯარიმა. საუბარია გაზის მრიცხველის დაზიანების ფაქტზე, რომელიც მის სადარბაზოში ღია კაბინაშია დამონტაჟებული.
კოვზირიძის თქმით, მრიცხველები შენობის სადარბაზოში ღია მდგომარეობაშია და ყველას აქვს წვდომა, რის გამოც ვერ ხსნის, ვის შეიძლება დაეზიანებინა მოწყობილობა.
„ჩვენს სადარბაზოში მრიცხველები ღიად დგას. არ ვიცით, ვის შეეძლო შეხება და დაზიანება. ინკასატორმა ერთ-ერთ შემოწმებაზე თქვა, რომ თითქოს მრიცხველზე საეჭვო ნიშნები იყო და ექსპერტიზა დაინიშნა. ექსპერტიზამ დაადგინა დაზიანება, რაც ბუნებრივი აირის უკანონო მიტაცების ეჭვს იწვევს, რის საფუძველზეც 1600 ლარით დაგვაჯარიმეს. ამას არაკანონიერად და უსაფუძვლოდ მივიჩნევთ,“ – უთხრა „აჭარა თაიმსს“ ინგა კოვზირიძემ.
მისივე თქმით, ოჯახს არანაირი ინფორმაცია არ ჰქონდა დაზიანების შესახებ და გადასახადებს რეგულარულად იხდიდნენ:
„მრიცხველი მუშაობს, ჩვენ არ შეგვიმჩნევია რამე პრობლემა. ექსპერტიზამ კი დაასკვნა, თითქოს გაზის მოპარვის მცდელობა ყოფილა. არავინ ამბობს, ვინ დააზიანა, რით მოხდა ეს. წლებია, ჩვენს სადარბაზოში კაბინა ღიაა და ნებისმიერ გამვლელს შეუძლია მიადგეს მრიცხველს. ამ პირობებში მოქალაქე დაცული არ არის, მაგრამ პასუხისმგებელი მაინც აბონენტი გამოდის,“ — აცხადებს კოვზირიძე.
დაჯარიმებულმა მოქალაქემ მარეგულირებელ კომისიაში გაასაჩივრა კომპანიის გადაწყვეტილება და მომხდარის სრულყოფილი გამოკვლევა მოითხოვა. აბონენტი არ გამორიცხავს სასამართლოს გზითაც დაიცვას თავი და მოითხოვოს ჯარიმის გაუქმება.
„სოკარ ჯორჯია გაზი აჭარას“ დირექტორმა, ვახტანგ ბერიშვილმა „აჭარა თაიმსთან“ კომენტარი არ გააკეთა და აღნიშნა, რომ კომპანია მომხმარებლის სარჩელის განხილვასა და მარეგულირებელი კომისიის გადაწყვეტილებას დაელოდება, რის შემდეგაც გადატარდება შესაბამისი ზომები.
