„ქართული ოცნების“ პროკურატურამ ქვეყნის ყოფილი პრემიერ-მინისტრისა და შინაგან საქმეთა მინისტრის, გიორგი გახარიას მიმართ სისხლისსამართლებრივი დევნა დაიწყო. საქმე ეხება საზოგადოებისთვის ცნობილ 2019 წლის 20–21 ივნისის („გავრილოვის ღამე“) და ჩორჩანას ეპიზოდებს.
გამოძიების ინფორმაციით, გახარია ბრალდება ორზე მეტი პირის მიმართ ჯანმრთელობის განზრახ მძიმე დაზიანების ორგანიზებაში, ასევე სახელმწიფო პოლიტიკური თანამდებობის პირის მიერ სამსახურებრივი უფლებამოსილების გადამეტებაში.
პროკურატურის განცხადებით, 2019 წლის 20 ივნისს რუსთაველის გამზირზე მიმდინარე დემონსტრაცია ძალადობრივ ფორმას იღებდა, რის შემდეგაც მაშინდელმა შინაგან საქმეთა მინისტრმა, გიორგი გახარიამ, სამართალდამცველებს კანონმდებლობის დარღვევით დაავალა სპეციალური საშუალებების – მათ შორის რეზინის ტყვიების – ერთობლივად და გაფრთხილების გარეშე გამოყენება. შედეგად, ათეულობით მოქალაქე დაშავდა, ორმა მოქალაქემ თვალი დაკარგა, ხოლო ხუთმა ჯანმრთელობის მძიმე დაზიანება მიიღო.
ბრალდების მეორე ეპიზოდი შეეხება 2019 წლის 24 აგვისტოს სოფელ ჩორჩანასთან დამატებითი საპოლიციო საგუშაგოს აღმართვის ფაქტს. პროკურატურის ინფორმაციით, გიორგი გახარიამ ეს გადაწყვეტილება ერთპიროვნულად მიიღო – პრემიერ-მინისტრთან შეუთანხმებლად, ეროვნული უსაფრთხოების საბჭოსა და სახელმწიფო უსაფრთხოების სამსახურთან კოორდინაციის გარეშე.
გამოძიების შეფასებით, აღნიშნული ქმედებამ დაძაბულობა გაზარდა საოკუპაციო ხაზთან და საფრთხე შეუქმნა ქვეყნის უსაფრთხოებას. საოკუპაციო ძალების კონტროლქვეშ მოექცა დაახლოებით ასი ჰექტარი ტერიტორია, მათ შორის ხაშურის მუნიციპალიტეტის სოფლების – ყობისა და წნელისის – მოსახლეობის საცხოვრებელი სახლები.
გიორგი გახარიას ბრალდება წარედგინა საქართველოს სისხლის სამართლის კოდექსის 25, 117-ე მუხლის მე-3 ნაწილის „მ“ ქვეპუნქტით (ჯანმრთელობის განზრახ მძიმე დაზიანების ორგანიზება) და 333-ე მუხლის მე-2 ნაწილით (სამსახურებრივი უფლებამოსილების გადამეტება), რაც 13 წლამდე თავისუფლების აღკვეთას ითვალისწინებს. პროკურატურა სასამართლოს გახარიას მიმართ აღკვეთის ღონისძიების სახით პატიმრობის შეფარდების შუამდგომლობით კანონით დადგენილ ვადაში მიმართავს.
