„საერთაშორისო გამჭვირვალობა – საქართველო“ აქვეყნებს კვლევას, რომელიც „ქართული ოცნების“ მოქმედი დეპუტატების ბიზნესკავშირებს, სახელმწიფო შესყიდვებში მათთან დაკავშირებული კომპანიების მონაწილეობასა და პარტიულ შემოწირულობებს ეხება.
ორგანიზაციის ინფორმაციით, 87 დეპუტატიდან 41-ს აქვს კავშირი ბიზნესთან, თუმცა მათგან მხოლოდ 17 უთითებს ბიზნესიდან მიღებულ შემოსავალს ქონებრივ დეკლარაციაში. ბოლო წარდგენილი დეკლარაციების მიხედვით, მილიონ ლარზე მეტი შემოსავალი ბიზნესიდან მიღებული აქვთ რამდენიმე დეპუტატს, მათ შორის ანტონ ობოლაშვილს, შოთა ბერეკაშვილს, გიორგი ჭყონიას, ზაალ დუგლაძესა და გიორგი ბარვენაშვილს. ყველაზე მეტ კომპანიაში – 21-ში, წილი აქვს ვასილ ჩიგოგიძეს.
კვლევის თანახმად, დეპუტატებთან დაკავშირებულ 7 კომპანიას მოგებული აქვს 271 სახელმწიფო ტენდერი, რომლის საერთო ღირებულება 465 900 569 ლარს შეადგენს. ამასთან, 13 კომპანიამ, რომლებშიც დეპუტატები ფლობენ წილს, 301 გამარტივებული შესყიდვის ფარგლებში სახელმწიფოსგან 7 736 986 ლარი მიიღო. მონაცემები მოიცავს პერიოდს 2015 წლიდან 2025 წლის 24 ოქტომბრამდე.
TI ყურადღებას ამახვილებს პოლიტიკურ შემოწირულობებზეც. ორგანიზაციის ინფორმაციით, „ქართული ოცნების“ მე-11 მოწვევის პარლამენტის მოქმედ დეპუტატებს 2012 წლიდან პოლიტიკური პარტიებისთვის საერთო ჯამში შეწირული აქვთ 2 738 586 ლარი. აქედან 2 633 086 ლარი „ქართულ ოცნებას“ და მის საპრეზიდენტო კანდიდატს სალომე ზურაბიშვილს გადაეცა, 66 500 ლარი – „ერთიან ნაციონალურ მოძრაობას“, ხოლო 39 000 ლარი – პარტია „ხალხის ძალას“.
კვლევაში ასევე აღნიშნულია, რომ ორმა დეპუტატმა 2012 წელს მაშინდელ მმართველ პარტიას – „ერთიან ნაციონალურ მოძრაობას“ – შესწირა თანხა, ხოლო „ხალხის ძალას“ დონაცია ორმა მოქმედმა დეპუტატმა განახორციელა.
საერთაშორისო გამჭვირვალობა – საქართველო აცხადებს, რომ კვლევა სრულად ეფუძნება საჯარო წყაროებს და მოიცავს იმ 87 დეპუტატის მონაცემებს, რომლებიც 2025 წლის 24 ოქტომბრის მდგომარეობით მონაწილეობდნენ საპარლამენტო საქმიანობაში. ორგანიზაციის განმარტებით, კვლევის მიზანია პარლამენტის წევრების ბიზნესინტერესებსა და სახელმწიფო რესურსებზე წვდომას შორის არსებული კავშირების ანალიზი.
