„ქართული ოცნების“ შინაგან საქმეთა სამინისტროს თანამშრომლებმა ორგანიზებული დანაშაულებრივი ჯგუფის 6 წევრი დააკავეს, მათ შორის ერთი ლიდერი. გამოძიების ინფორმაციით, დაკავებულები თბილისსა და სხვადასხვა რეგიონში სასურსათო მაღაზიებს ქურდავდნენ, ხოლო უკანონოდ, ფარულად დაუფლებულ ნივთებს წინასწარი შეთანხმებით სავაჭრო ობიექტებში აბარებდნენ.
დაკავებულთა შორის არიან ის მოვაჭრეებიც, რომლებიც ნაქურდალ საქონელს იბარებდნენ მისი შემდგომი რეალიზაციის მიზნით. დაკავებული ექვსი პირიდან ორი არასრულწლოვანია.
ჩატარებული გამოძიებით, მათ შორის ფარული საგამოძიებო მოქმედებების შედეგად, დადგინდა, რომ ორგანიზებული ჯგუფის ლიდერი დანაშაულებრივ სქემაში სისტემატურად ჩართავდა არასრულწლოვნებს, მათ შორის პასუხისმგებლობის ასაკს მიუღწეველ მოზარდებს. გამოძიების ინფორმაციით, ლიდერი კონტაქტზე იყო ჯგუფის წევრ არასრულწლოვნებთან და უზრუნველყოფდა მათ გადაადგილებას თბილისსა და რეგიონებში, სადაც წინასწარ შემუშავებული გეგმის მიხედვით სასურსათო ობიექტებს ქურდავდნენ.
არასრულწლოვნები სხვადასხვა ობიექტიდან მართლსაწინააღმდეგოდ ეუფლებოდნენ დიდი ოდენობით თანხას, სურსათს, ალკოჰოლურ სასმელებსა და სიგარეტებს. ნაქურდალ პროდუქტს ისინი საბაზრო ღირებულებაზე ნაკლებ ფასად, წინასწარი შეთანხმებით, თბილისში, თევდორე მღვდლის ქუჩაზე მდებარე სავაჭრო ცენტრში აბარებდნენ. მიღებული თანხის ძირითადი ნაწილი, გამოძიების ინფორმაციით, ორგანიზებული ჯგუფის ლიდერს რჩებოდა.
ამასთან, დაკავებული მოვაჭრეების საცხოვრებელი სახლებისა და მათ კუთვნილი მაღაზიების ჩხრეკის შედეგად ამოღებულია სავარაუდოდ ნაქურდალი პროდუქციის რეალიზაციის შედეგად მიღებული დიდი ოდენობით ფულადი თანხა, სხვადასხვა დასახელების პროდუქტი, სიგარეტები და ალკოჰოლური სასმელები.
გამოძიება მიმდინარეობს ორგანიზებული ჯგუფის მიერ ჩადენილი ქურდობისა და წინასწარი შეცნობით დანაშაულებრივი გზით მოპოვებული ქონების შეძენა-გასაღების ფაქტზე. საქმე აღძრულია საქართველოს სისხლის სამართლის კოდექსის 177-ე მუხლის მე-4 ნაწილისა და 186-ე მუხლის მე-3 ნაწილის მიხედვით, რაც 10 წლამდე ვადით თავისუფლების აღკვეთას ითვალისწინებს.
