გარემოსდაცვითი ზედამხედველობის დეპარტამენტმა თბილისსა და რეგიონებში ნარჩენების მართვის კოდექსის დარღვევის დაახლოებით 40 ფაქტი გამოავლინა. სამართალდარღვევები, დედაქალაქის გარდა, დაფიქსირდა აჭარაში, სამეგრელოში, მცხეთა-მთიანეთში, ქვემო ქართლსა და კახეთში.
დარღვევები გამოვლინდა ბათუმში, ქობულეთსა და ხელვაჩაურში. უწყების ინფორმაციით, აღნიშნულ მუნიციპალიტეტებში დაფიქსირდა მუნიციპალური არასახიფათო ნარჩენების ღია წესით წვის შემთხვევები, ასევე მუნიციპალური არასახიფათო, სახიფათო, სამშენებლო, ინერტული და ცხოველური ნარჩენებით გარემოს დანაგვიანების ფაქტები.
მსგავსი დარღვევები გამოვლინდა სხვა ქალაქებსა და მუნიციპალიტეტებშიც, მათ შორის თბილისში, რუსთავსა და თელავში, ასევე ზუგდიდის, მცხეთის, დუშეთის, მარნეულის, გარდაბნის, ბოლნისის, ლაგოდეხის, საგარეჯოსა და ყვარლის მუნიციპალიტეტებში.
გარემოსდაცვითი ზედამხედველობის დეპარტამენტის ცნობით, სამართალდამრღვევების მიმართ კანონმდებლობით გათვალისწინებული შესაბამისი ზომები გატარდა.
