სარფში ქალი სასაფლაოზე დამარხული იპოვეს. ინფორმაცია „აჭარა თაიმსს“ ადგილობრივებმა მიაწოდეს. მათი თქმით, ცხედარი არსებული საფლავის ზედაპირზე იყო დამარხული. შემთხვევის ადგილზე საგამოძიებო მოქმედებები უკვე ჩატარდა, რის შემდეგაც ცხედარი ამოასვენეს.
ფაქტს „აჭარა თაიმსთან“ საუბრისას ადასტურებს ხელვაჩაურის მერის წარმომადგენელი სარფის ადმინისტრაციულ ერთეულში.
„რამდენიმე დღის წინ მოხდა ეს ამბავი, იყვნენ გამომძიებლები, ქალი დამარხული იყო. ადგილზე არავინ მიგვიშვა, მეტი დეტალი არ ვიცი,“ – განაცხადა ჩვენთან საუბრისას მერის წარმომადგენელმა.
ერთმანეთისგან დამოუკიდებელი წყაროების ცნობით, მკვლელობა სავარაუდოდ გონიოს ტერიტორიაზე მოხდა. ჩვენი ინფორმაციით, როგორც სავარაუდო ბრალდებული კაცი, ასევე მოკლული ქალი თურქეთის მოქალაქეები არიან.
შინაგან საქმეთა სამინისტროში „აჭარა თაიმსის“ კითხვებს არ პასუხეს.
