„აჭარა თაიმსის“ ინფორმაციით, ბათუმის ბოტანიკური ბაღის ტერიტორიაზე სავარაუდოდ ნარკოტიკულ საშუალებებს ინახავდნენ.
ადმინისტრაციიდან, ინფორმირებული წყაროს ცნობით, ე.წ. „ფაქტების“ განთავსების პერიოდში ბაღის ტერიტორიაზე სამეთვალყურეო კამერებს მიზანმიმართულად თიშავდნენ, რათა დანაშაული არ დაფიქსირებულიყო.
მომხდართან დაკავშირებით გამოძიებას სახელმწიფო უსაფრთხოების სამსახური აწარმოებს. უწყებაში ტრადიციისამებრ, ჩვენს ზარებს არ უპასუხეს.
„აჭარა თაიმსი“ თემასთან დაკავშირებით ბოტანიკური ბაღის ყოფილ დირექტორს, ირაკლი არჩაიას დაუკავშირდა. მან საგამოძიებო ორგანოში შესაძლო დაკითხვაზე ყოფნა უარყო.
„არსად ვყოფილვარ, არ მაქვს ინფორმაცია,“ – განაცხადა არჩაიამ ჩვენთან საუბრისას.
ამ ეტაპზე ჩვენთვის უცნობია, გამოიკითხა თუ არა გამოძიების ფარგლებში ბოტანიკური ბაღის მოქმედი დირექტორი, თენგიზ ტარიელაძე.
ჩვენი შეკითხვები მან უპასუხოდ დატოვა. ტარიელაძემ შეტყობინება ნახა, თუმცა პასუხი არ დაგვიბრუნა. სატელეფონო ზარისას კი სხვა პირმა გვაცნობა, რომ ის მობილურთან ახლოს არ იმყოფებოდა.
მასალის მომზადების პროცესში ბათუმის მერიის საზოგადოებასთან ურთიერთობის სამსახურიდან დაგვიკავშირდნენ და გვითხრეს რომ თემაზე განმარტება გაკეთდებოდა. თუმცა, ლოდინის მიუხედავად, უწყებიდან პასუხი ვერ მივიღეთ.
აქვე დაგაინტერესებთ🔻
ტურისტის გაუპატიურების საქმეზე ბათუმის ბოტანიკური ბაღის თანამშრომელს ბრალი წარუდგინეს
