ბათუმის №15 საჯარო ბაღის მშობლები ბავშვების ჯანმრთელობისა და უსაფრთხოებისთვის შეუსაბამო გარემოზე საუბრობენ და შესაბამის უწყებებს 3-წლიანი ჯგუფის სხვა ბაღში დროებით გადაყვანას სთხოვენ. მშობლების ინფორმაციით, ბაღში არიან თაგვები, ტარაკნები და მორიელები. მათივე თქმით, დაზიანებულია ტუალეტის კედელი, დაწესებულებაში კი არ არის გათბობა და ცხელი წყალი.
მშობლები ითხოვენ, რომ 30-35 ბავშვისგან შემდგარი ჯგუფი ახლომდებარე საჯარო ბაღში გადაიყვანონ. მათი ინფორმაციით, ბაღის ადმინისტრაცია და შესაბამისი უწყებები პრობლემის მოსაგვარებლად იანვარში რემონტის დაწყებას გეგმავენ. მშობლებს მიაჩნიათ, რომ ამ პირობებში ბავშვების კიდევ ორი თვით დატოვება დაუშვებელია.
„აჭარა თაიმსი“ ბაღის ადმინისტრაციასაც დაუკავშირდა და არსებული მდგომარეობის შესახებ განმარტების მიღება სცადა, თუმცა წარმომადგენლებმა ჩვენთან საუბარი არ ისურვეს.
