შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალებებისა და ფსიქოტროპული ნივთიერებების უკანონო შეძენა-შენახვის, რეალიზაციისა და რეალიზაციის ხელშეწყობის ბრალდებით სხვადასხვა დროს უცხო ქვეყნის 4 მოქალაქე დააკავეს.
უწყების ცნობით, ბრალდებულების პირადი ჩხრეკის, საცხოვრებელი სახლებისა და ავტომობილების შემოწმების, ასევე სხვადასხვა ლოკაციაზე ჩატარებული საგამოძიებო მოქმედებების შედეგად ნივთმტკიცებად განსაკუთრებით დიდი ოდენობით ნარკოტიკული საშუალებები და ფსიქოტროპული ნივთიერებები ამოიღეს.
ამოღებულ ნივთებს შორისაა 3 კილოგრამამდე „მეთადონი“, ასევე „კოკაინი“, „მეფედრონი“, „მარიხუანა“ და „პრეგაბალინი“.
პოლიციის ინფორმაციით, ამოღებულია ერთ-ერთი დაკავებულის მიერ რეალიზებული ნარკოტიკული საშუალება, რეალიზაციის შედეგად მიღებული თანხა და ნარკოტიკული ნივთიერებების დაფასოებისთვის საჭირო მასალებიც.
გამოძიება საქართველოს სისხლის სამართლის კოდექსის 260-ე, 260-ე კვარტა და 260-ე ტერცია მუხლებით მიმდინარეობს. აღნიშნული დანაშაულები სასჯელის სახით 20 წლამდე ან უვადო თავისუფლების აღკვეთას ითვალისწინებს.
