„აჭარა თაიმსის“ ინფორმაციით, სახელმწიფო უსაფრთხოების სამსახურმა ბათუმის მუნიციპალური ინსპექციის თანამშრომელი დააკავა.
ჩვენი ინფორმაციით, ინსპექციის ერთ-ერთი მთავარი სპეციალისტი ქრთამის აღების ბრალდებით აიყვანეს.
ბათუმის მუნიციპალურ ინსპექციაში განაცხადეს, რომ აღნიშნულ ინფორმაციას „ჯერჯერობით ვერ დაგვიდასტურებენ“.
განახლება🔻
„აჭარა თაიმსის“ ინფორმაცია დღეს, ოფიციალურად დადასტურდა. სუს-ის ცნობით, გამოძიებით დადგინდა, რომ ბრალდებულმა საქართველოს მოქალაქისგან ქრთამი აიღო. უწყების ცნობით, თანხა ბათუმში უკანონოდ აშენებულ კომერციული დანიშნულების ფართზე კანონით გათვალისწინებული ჯარიმის თავიდან აცილების სანაცვლოდ მიიღო. იგი დანაშაულის ჩადენის დროს დააკავეს.
სახელმწიფო უსაფრთხოების სამსახურის ინფორმაციით, დაკავებულის უშუალო მოვალეობა ბათუმის ტერიტორიაზე მიმდინარე ყველა კლასის სამშენებლო ობიექტის კონტროლი, ასევე, უნებართვოდ მიმდინარე და უკვე უკანონოდ განხორციელებულ სამშენებლო სამუშაოებზე კანონით გათვალისწინებული რეაგირება იყო.
გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც 6-დან 9 წლამდე ვადით თავისუფლების აღკვეთას ითვალისწინებს.
