ქობულეთში შიდა მუნიციპალური მიკროავტობუსებით მგზავრობის საფასური გაიზარდა. ცვლილება 1-ელ და მე-2 ნომერ მიკროავტობუსებს შეეხო, რომლებიც რუსთაველისა და აღმაშენებლის ქუჩებზე გადაადგილდებიან.
მგზავრობის ღირებულება 70 თეთრიდან 1 ლარამდე გაიზარდა.
ტარიფის ცვლილება ქობულეთი-ბათუმის მიმართულებით მგზავრობის გაძვირების შემდეგ მოხდა. აღნიშნულ მარშრუტზე მგზავრობის საფასური 3 ლარიდან 4 ლარამდე გაიზარდა.
ბათუმი-ქობულეთის მიკროავტობუსების მარშრუტი აღარ გაიზრდება, ტარიფი კი 4 ლარი დარჩება
ცნობისთვის, ქობულეთის მერიამ, მუნიციპალურ ავტობუსებში მგზავრობის საფასურის ელექტრონული გადახდის სისტემის დანერგვა დღემდე ვერ უზრუნველყო.
მოსახლეობის ნაწილი წლებია უშედეგოდ ითხოვს გადახდის თანამედროვე და მარტივი საშუალების დანერგვას.
