სახელმწიფო აუდიტის სამსახურის ანგარიშის მიხედვით, „საქართველოს რკინიგზაში“ 2023 წელს ჩატარებული ინვენტარიზაციის შედეგად 5 588 კგ, ჯამში 18 216 ლარის ღირებულების ევროდიზელის საწვავის დანაკლისი გამოვლინდა. აქედან 1 756 კგ საწვავზე პასუხისმგებელი პირის ბრალეულობა დადგინდა და დანაკლისი ანაზღაურდა, თუმცა დარჩენილი 3 832 კგ საწვავის ღირებულება აუნაზღაურებელი დარჩა.
აუდიტის ანგარიშის თანახმად, რკინიგზამ ვერ წარმოადგინა დოკუმენტაცია, რომლითაც დადასტურდებოდა დარჩენილ დანაკლისთან დაკავშირებით მასალების სამართალდამცავი ორგანოებისთვის გადაგზავნა ან ზიანის ანაზღაურების მიზნით გატარებული ღონისძიებები.
აუდიტმა ასევე გამოავლინა ხარვეზები ლოკომოტივების საწვავის ხარჯვის კონტროლის პროცესში. შემოწმებული 20 სამარშრუტო ფურცლიდან ექვს შემთხვევაში ლოკომოტივის ნამუშევარი დრო სიჩქარმზომი ლენტის მონაცემებთან შედარებით ჯამში 21,55 საათით მეტი იყო მითითებული. ამის შესაბამისად, საწვავის ხარჯიც 512 ლიტრით მეტი იყო აღრიცხული.
ანგარიშში აღნიშნულია, რომ 2023-2024 წლებში რკინიგზის კონტროლის, მონიტორინგისა და ინსპექტირების დეპარტამენტმა სამარშრუტო ფურცლებში სამანევრო სამუშაოების შესრულების პერიოდის დაუსაბუთებლად გაზრდის შემთხვევებიც გამოავლინა. შედეგად, არამიზნობრივად გაწეულმა საწვავის ხარჯმა 5 998 ლიტრი შეადგინა.
აუდიტის სამსახურის შეფასებით, რკინიგზაში არ არსებობს ლოკომოტივების ნამუშევარი საათების აღრიცხვის ცენტრალიზებული, ავტომატიზებული ან ელექტრონული სისტემა. ასევე, საწვავის ხარჯვის ნორმები 2013 წელს იყო დამტკიცებული და შემდგომ არ განახლებულა.
საწვავის ხარჯვის კონტროლის გასაუმჯობესებლად აუდიტის სამსახურმა რკინიგზას რეკომენდაციები მისცა, მათ შორის, საწვავგასამართი ადგილების ვიდეოკონტროლით აღჭურვის, ცისტერნებში საწვავის დონის მონიტორინგის სისტემების დამონტაჟებისა და საწვავის გამცემი მოწყობილობების პერიოდული შემოწმების შესახებ.
