ბათუმში, იმედაშვილის ქუჩის №23-ში მცხოვრებლები შიშობენ, რომ მეზობლად მიმდინარე მშენებლობამ შესაძლოა მათი სახლი დააზიანოს და საცხოვრებელი სახლი ჩამოინგრეს.
მოქალაქეების თქმით, 130 წელზე მეტი ხნის სახლის მდგომარეობა ისედაც ავარიულია, თუმცა მომიჯნავედ მიმდინარე მრავალსართულიანი კორპუსის მშენებლობისას მძიმე ტექნიკის მუშაობით გამოწვეული ვიბრაციის შედეგად შენობის კედლებზე ახალი ბზარები გაჩნდა. მათი მტკიცებით, ნაპრალები ყოველდღიურად იზრდება.
მშენებლობა საცხოვრებელი სახლიდან დაახლოებით ერთ მეტრში მიმდინარეობს. ადგილობრივის, ალექსანდრე გოგუაძის თქმით, პრობლემის შესახებ არაერთ უწყებას მიმართეს, თუმცა მშენებლობის შეჩერებას ვერ მიაღწიეს. ოჯახი მშენებლობის შედეგად მიყენებული ზიანის ანაზღაურებას ითხოვს.
მოქალაქეები შიშობენ, რომ არსებული მდგომარეობის გაგრძელების შემთხვევაში, შესაძლოა, სახლი საცხოვრებლად სახიფათო გახდეს.
„აღნიშნულ ობიექტზე სამშენებლო ნორმებისა და დადგენილი მოთხოვნების დარღვევის ფაქტი გამოვლინდა, რის საფუძველზეც მიღებულ იქნა მშენებლობის შეჩერების შესახებ შესაბამისი გადაწყვეტილება. დარღვევების აღმოფხვრის მიზნით კომპანიამ განახორციელა შესაბამისი ცვლილებები და გადაიხადა დაკისრებული ჯარიმა, რის შემდეგაც მას მშენებლობის გაგრძელების შესაძლებლობა მიეცა. რაც შეეხება მომიჯნავე საცხოვრებელ სახლს, იმედაიშვილის 23 ნომერში უკვე ჩატარებული აქვს შესაბამისი ექსპერტიზა და იგი ავარიულად არის მიჩნეული. ამ ეტაპზე, მუნიციპალური ინსპექციის უფლებამოსილების ფარგლებში, დამატებითი ღონისძიებების გატარების სამართლებრივი საფუძველი არ იკვეთება. თუმცა, სამშენებლო პროცესში ახალი დარღვევების გამოვლენის შემთხვევაში, ინსპექცია კანონმდებლობით გათვალისწინებულ შესაბამის რეაგირებას მოახდენს და დაიწყებს სამშენებლო სამართალდარღვევის საქმისწარმოებას,“ – განაცხადეს ბათუმის მუნიციპალურ ინსპექციაში.
მშენებელი კომპანიის წარმომადგენლები „აჭარა თაიმსმა“ ადგილზე ვერ იპოვა. ჩვენ მზად ვართ, გავაშუქოთ კომპანიის პოზიციაც და მკითხველს მივაწოდოთ ინფორმაცია, რა პასუხი ექნებათ მათ მოქალაქეების პრეტენზიებზე.
