ბათუმის საკრებულოს შვიდი წევრის ორდღიანი ვიზიტი თბილისში, სადაც ისინი დედაქალაქის საკრებულოს წარმომადგენლებს შეხვდნენ, ადგილობრივი ბიუჯეტიდან 3 999 ლარი დაიხარჯა.
საჯარო ინფორმაციის მიხედვით, რომელიც „აჭარა თაიმსმა“ გამოითხოვა, ირკვევა, რომ მივლინების ფარგლებში დღიურ ნორმასა და სასტუმროს მომსახურებაში 3 430 ლარი დაიხარჯა. გარდა ამისა, ორი ავტომობილისთვის ჯამში 161 ლიტრი საწვავი მოიხმარეს, რომლის ღირებულებამაც 569 ლარი შეადგინა.
თბილისში ბათუმის საკრებულოს შვიდი წარმომადგენელი იმყოფებოდა. დელეგაციაში იყვნენ თავმჯდომარე, მისი მოადგილეები, ფრაქცია „ქართული ოცნება – დემოკრატიული საქართველოს“ თავმჯდომარე, იურიდიულ და საპროცედურო საკითხთა კომისიის თავმჯდომარე, ინფრასტრუქტურის განვითარების კომისიის თავმჯდომარე და თავმჯდომარის თანაშემწე.
ბათუმის საკრებულოს ინფორმაციით, ვიზიტის მიზანი თვითმმართველობებს შორის თანამშრომლობის გაღრმავება და გამოცდილების გაზიარება იყო.
„ორდღიანი სამუშაო ვიზიტის ფარგლებში ბათუმის საკრებულოს წევრები გაეცნენ თბილისის საკრებულოს საქმიანობის სპეციფიკას, კომისიებისა და მაჟორიტარი წევრების მუშაობის პრაქტიკას. დელეგაცია ასევე დაესწრო თბილისის საკრებულოს და კომისიების სხდომებს“, – წერს ბათუმის საკრებულო სოციალურ ქსელში.
