ხუთი ოპოზიციური პარტიის შესაძლო აკრძალვის საქმეზე საკონსტიტუციო სასამართლოში განხილვა კითხვა-პასუხის რეჟიმში გრძელდება. დღევანდელ სხდომაზე მოსამართლეებმა მხარეებს კითხვები დაუსვეს, განხილვის ერთ-ერთი მთავარი თემა კი საქართველოს კონსტიტუციის 78-ე მუხლი და მისი ადგილი კონსტიტუციურ წყობილებაში იყო.
სასამართლოს მოსამართლე ევა გოცირიძემ „ქართული ოცნების“ წარმომადგენელს, გიორგი კახიანს, სთხოვა დაეზუსტებინა, მიიჩნევს თუ არა მმართველი პარტია ევროატლანტიკურ ინტეგრაციას საქართველოს კონსტიტუციური წყობილების განუყოფელ ნაწილად.
კახიანმა განმარტა, რომ 78-ე მუხლი საგარეო პოლიტიკური მიმართულების საკითხია და ის კონსტიტუციის სხვა დებულებებთან ერთობლიობაში უნდა განიხილებოდეს.
„მე ვთვლი, რომ 78-ე მუხლი საგარეო მიმართულების არის და არის ევროატლანტიკურ სტრუქტურებში ინტეგრაცია“, – განაცხადა გიორგი კახიანმა.
სხდომაზე მხარეებს შორის კვლავ დავის საგანი გახდა მტკიცებულებების გამოკვლევის საკითხიც. ოპოზიციური პარტიების წარმომადგენლები მიიჩნევენ, რომ სასამართლომ ამ პროცესისთვის კანონით გათვალისწინებული სრულფასოვანი ეტაპი არ უზრუნველყო, რაც მათ სარჩელში მოყვანილი ფაქტების გადამოწმების შესაძლებლობას უზღუდავს.
შეგახსენებთ, რომ სასამართლომ „ლელო – ძლიერი საქართველოს“ შუამდგომლობა მტკიცებულებების გამოკვლევის შესახებ ნაწილობრივ დააკმაყოფილა. თუმცა, პლენუმმა არ დააკმაყოფილა მოთხოვნა სარჩელში მითითებული ყველა ინტერნეტბმულის სხდომაზე დემონსტრირების თაობაზე. სასამართლოს განმარტებით, ცალკეული მტკიცებულებების რელევანტურობას განხილვის პროცესში, მხარეთა შუამდგომლობით ან საკუთარი ინიციატივით შეაფასებს.
ოპოზიციის წარმომადგენლები აცხადებენ, რომ ამგვარი მიდგომით მტკიცებულებების შინაარსობრივი განხილვის შესაძლებლობა იზღუდება. პარტია „გახარია საქართველოსთვის“ წევრის, ბერდია სიჭინავას შეფასებით, სასამართლომ საკუთარი რეგლამენტით გათვალისწინებული მტკიცებულებების გამოკვლევის ეტაპი ფაქტობრივად გამოტოვა.
მმართველი პარტიის წარმომადგენლები კი საპირისპირო პოზიციაზე არიან. არჩილ გორდულაძის განცხადებით, მოპასუხე მხარე სამართლებრივი განხილვის ტელედებატებად და შოუდ გადაქცევას ცდილობს. მისი შეფასებით, ოპოზიციურ პარტიებს სამართლებრივი არგუმენტები არ აქვთ და პროცესში დემაგოგიის გზით ცდილობენ ფონს გასვლას.
დღევანდელ სხდომაზე განხილვის საგანი გახდა ნიკა გვარამიას კიდევ ერთი შუამდგომლობაც. „კოალიცია ცვლილებისთვის“ წარმომადგენელი ითხოვდა, რომ იმ შემთხვევაში, თუ სასამართლო პარტიების აკრძალვის გადაწყვეტილებას მიიღებდა, მისი აღსრულებისთვის მინიმუმ ერთთვიანი ვადა განესაზღვრა.
გვარამიას განმარტებით, ეს მოპასუხე მხარეს საერთაშორისო სამართლებრივი მექანიზმების გამოყენებისა და სამართლებრივი ურთიერთობების მოწესრიგების შესაძლებლობას მისცემდა. შუამდგომლობა პლენუმმა არ დააკმაყოფილა.
სასამართლოს თავმჯდომარის, რევაზ ნადარაიას განმარტებით, გადაწყვეტილების აღსრულების გადავადებაზე მსჯელობა უშუალოდ საბოლოო გადაწყვეტილებაში უნდა მოხდეს და ამ ეტაპზე შუამდგომლობის დაკმაყოფილება სამართლებრივ საფუძველს მოკლებული იქნებოდა.
თავის მხრივ, „ქართული ოცნების“ წარმომადგენელმა გიორგი კახიანმა შუამდგომლობის დაყენება გააკრიტიკა. მისი შეფასებით, სასამართლოსგან წინასწარ იმის მოთხოვნა, რომ შესაძლო აკრძალვის გადაწყვეტილებას აღსრულების გადავადება დაუკავშიროს, გაუმართლებელია.
სხდომის დაწყებამდე ოპოზიციური პარტიების წარმომადგენლებმა პროცესის მიმართ უნდობლობაზეც ისაუბრეს. „კოალიცია ცვლილებისთვის“ წევრმა გიგა ლემონჯავამ განაცხადა, რომ მიაჩნია, გადაწყვეტილება უკვე მიღებულია და სასამართლო მხოლოდ ფორმალურ პროცედურას გადის. ამ შეფასებას არ ეთანხმებიან მმართველი პარტიის წარმომადგენლები.
ცნობისთვის: საკონსტიტუციო სასამართლოში ხუთი ოპოზიციური პარტიის აკრძალვის მოთხოვნით „ქართული ოცნების“ 88 დეპუტატის სარჩელის განხილვა 21 ოქტომბერს დაიწყო. მოსარჩელეები არაკონსტიტუციურად ცნობას ითხოვენ შემდეგი პოლიტიკური გაერთიანებებისთვის: „ერთიანობა – ნაციონალური მოძრაობა“, „კოალიცია ცვლილებისთვის“, „ძლიერი საქართველო – ლელო“, „ფედერალისტური პარტია“ და „გახარია საქართველოსთვის“.
საქმეს საკონსტიტუციო სასამართლოს პლენუმი შვიდი მოსამართლის შემადგენლობით განიხილავს. კონსტიტუციურ სარჩელს თან ერთვის XI მოწვევის პარლამენტში შექმნილი დროებითი საგამოძიებო კომისიის დასკვნა.
