AJARATIMES.GE-ის ინფორმაციით, ბათუმის ცენტრალურ პარკში იეჰოვას მოწმეებს თავს დაესხნენ, დაუზიანეს საინფორმაციო სტელაჟიც. თვითმხილველი “აჭარა თაიმსს” უყვება, რომ ორმა პირმა იეჰოვას მოწმეებს მიაყენეს სიტყვიერი და ფიზიკური შეურაცხყოფა.
“დავინახე ვიღაც ორი მთვრალი ახალგაზრდა, შავებში ჩაცმულნი ჩხუბობენ. რა თქმა უნდა შევჩერდი… ერთი აგინებდა ბოლო ხმაზე და უმტვრევდა ამათ ბანერებს, მეორე აჩერებდა თითქოს, მაგრამ ბოლომდე არა. იქვე იდგა პარკის პოლიციელი, ესეც თან აჩერებდა, თან ალბათ ფიქრობდა მეც არ მომხვდეს ხელიო…
შევჩერდი და ვკითხე, რატომ აგინებ, რა დაგიშავეს თქო… შენ ვინ გეკითხებაო, წადი პირჯვარი გადაიწერე და დაიძინეო… მოვიდა ჩემთან და დამემუქრა. დისტანცია დაიჭირე-თქო, მეც ავიმაღლე ხმა და 112-ში დასარეკად ტელეფონი ამოვიღე..
პარკის დაცვამ და თანმხლებმა რომ დაინახეს საზოგადოებაც ჩაერია, შეიძლება პოლიცია მოვიდესო, ამ ხულიგანის გარიდება დაიწყეს, ის მაინც კაცობდა და იგინებოდა,” – გვიყვება ნათია სირაბიძე.
ფაქტის შესახებ ინფორმირებულია იეჰოვას მოწმეების სამეფო დარბაზის პრესსამსახურიც, სადაც გვითხრეს, რომ დეტალებს არკვევენ და დამატებით ინფორმაციას მოგვიანებით მოგვაწვდიან.
