აჭარის განათლების სამინისტრო და ბათუმის მერია საავტორო კინოს ბათუმის საერთაშორისო ფესტივალს არც წელს დააფინანსებს, გადაწყვეტილების შესახებ ორგანიზაციას უკვე აცნობეს. მესამე წელია, რაც სახელმწიფო biaff-ს ფინანსების გარეშე ტოვებს.
კინოფესტივალის მენეჯერისთვის გაუგებარი და დაუსაბუთებელია სახელმწიფო უწყებების გადაწყვეტილება. ზვიად ელიზიანის თქმით, საერთაშორისო ფესტივალს პრობლემები ძირითადად, ბათუმში ექმნება.
“2022 წლიდან დაიწყო ფინანსური პრობლემები ბიაფის კინოფესტივალისთვის. სახელმწიფო ინსტიტუტების მხრიდან შეწყდა დაფინანსება. სამწუხაროდ, როგორც ჩვენთვის ცნობილია ძირითადი პრობლემები ბიაფფს უშუალოდ აჭარაში ექმნება. ხდება უარყოფითი ინფორმაციის გავრცლება, აპელირება იმაზე რომ თითქოსდა ბიაფი არ არის ისეთი მასშტაბური როგორც ადრე და ა.შ. ბიაფის კინოფესტივალი უკვე მესამე წელია ვერ ხვდება იმ 10-15 ფესტივალს შორის, რომელიც ფინანსდება ბათუმის მერიისა და აჭარის განათლების სამინისტროს მიერ.
ჩვენ მიერ მოთხოვნილ წერილზე საპასუხოდ, აჭარის განათლების სამინისტროდან გვაცნოებს, რომ თურმე ბიაფფმა ვერ გადალახა მინიმალური ქულების ზღვარი – კომისიის წევრების შეფასებით. თუმცა ბიაფფი სრულად პასუხობს ამ კონკურსების პირობებს და შეფასების კრიტერიუმებს. სამართლიანი შეფასების პირობებში შეუძლებელია, რომ ბიაფის კინოფესტივალი არ დაფინანსდეს. კომისიაში 9 წევრია, აქედან 4 სამინისტროს, 1 მერიის, 1 საკრებულოს, 1 უმაღლესი საბჭოს წარმომადგენელია და ორი გარედან მოწვეული ხელოვანი. ანუ ხმათა უმრავლესობით გასაგებია, რომ მათთვის სასურველი ყოველგვარ არგუმენტს მოკლებული უსამართლო გადაწყვეტილება იქნა მიღებული,” – აღნიშნა ზვიად ელიზიანმა “აჭარა თაიმსთან” საუბრისას.
ინფორმაციისთვის: სახელმწიფოს მხრიდან დაფინანსებაზე უარის თქმის მიუხედავად, ბათუმის საერთაშორისო ფესტივალი მაინც ჩატარდება. „ბიაფი“ 27 სექტემბერიდან 3 ოქტომბრამდე ჩატარდება.
