ფოთის საქალაქო სასამართლომ გარემოსდაცვითი ზედამხედველობის დეპარტამენტისა და საქართველოს სასაზღვრო პოლიციის თანამშრომლების მიერ შედგენილი ადმინისტრაციული სამართალდარღვევის ოქმის საფუძველზე, პანამის დროშის ქვეშ მცურავი გემი სამართალდამრღვევად ცნო და მას 100 000 ლარის ოდენობის ჯარიმა დააკისრა.
გემს საქართველოს ტერიტორიული წყლების დატოვებისა და თავისუფალი ნაოსნობის უფლება მხოლოდ მას შემდეგ მიეცა, რაც დაკისრებული საჯარიმო სანქცია და გარემოსთვის მიყენებული ზიანის ანაზღაურების თანხა სრულად გადაიხადა.
გარემოსდაცვითი ზედამხედველობის დეპარტამენტის განცხადებით, ზღვის დაბინძურების ფაქტების გამოვლენა, აღკვეთა და პრევენცია უწყების ერთ-ერთი უმთავრესი პრიორიტეტია.
მათი ინფორმაციით, მიმდინარე წელს უკვე გამოვლენილია ზღვის დაბინძურების 4 შემთხვევა, რომლებიც უცხო ქვეყნის დროშის ქვეშ მცურავ გემებს უკავშირდება. 2024 წლის განმავლობაში კი შავი ზღვის დაბინძურების სულ 16 ფაქტი დაფიქსირდა.
