დღეს, ხელვაჩაურის მუნიციპალიტეტის საკრებულოში მომხდარმა ძალადობის ფაქტმა მედიის თავისუფლებისა და ჟურნალისტის პროფესიული უფლებების დარღვევის მორიგი შემთხვევა გამოავლინა – ჟურნალისტი და მედიასაშუალება „აჭარა თაიმსის“ დამფუძნებელი სულხან მესხიძე ფიზიკური და სიტყვიერი ანგარიშსწორების სამიზნე გახდა.
ინციდენტი საკრებულოს სხდომის მიმდინარეობისას მოხდა. მესხიძეს სხდომის გაშუქების შესაძლებლობა არ მიეცა – მას თავდაპირველად სიტყვიერად დაუპირისპირდნენ საჯარო მოხელეები, რაც მალევე ფიზიკურ ანგარიშწორებაში გადაიზარდა. საკრებულოს სხდომათა დარბაზში, სადაც საკითხების საჯარო განხილვა უნდა შედგეს, მერიის თანამშრომლებმა ჟურნალისტი ძალის გამოყენებით, ხელების გადაგრეხვით გამოათრიეს დარბაზიდან.
დაპირისპირებისას ტელეფონს ხელი მოხვდა, რა დროსაც ვიდეოჩაწერა შეწყდა, თუმცა ინციდენტის ამსახველი კადრების დიდი ნაწილის შენარჩუნება მოხერხდა.
მნიშვნელოვანია, რომ მომხდარს ესწრებოდა ხელვაჩაურის საკრებულოს თავმჯდომარე თენგიზ ირემაძე, თუმცა მისგან არ ყოფილა არანაირი რეაგირება ფიზიკურ ანგარიშსწორებაზე, რაც კიდევ უფრო ამძიმებს საერთო სურათს.
საგულისხმოა ის ფაქტი, რომ საკრებულოს სხდომათა დარბაზი მიზანმიმართულად ივსება მერიის თანამშრომლებით, რაც რეალურად ზღუდავს როგორც მოქალაქეების, ისე მედიის წვდომას საჯარო პროცესებზე. სწორედ ამ პრაქტიკის შესახებ შეკითხვებმა და დაინტერესებამ გამოიწვია საჯარო მოხელეების მხრიდან აგრესიული ქმედება.
