ბათუმში, 26 მაისისა და აბაშიძის ქუჩების გზაჯვარედინზე, ერთი კვირის წინ მომხდარი ფიზიკური დაპირისპირების საქმეზე შინაგან საქმეთა სამინისტრო კვლავ არ ასაჯაროებს, თუ რა მუხლით მიმდინარეობს გამოძიება. მომხდართან დაკავშირებით უწყებაში მხოლოდ ის გვითხრეს, რომ “ამ ეტაპზე ვერაფერს გვეტყვიან.”
ინციდენტის თვითმხილველი არაერთი მოქალაქე გახდა. ფიზიკური დაპირისპირება მასშტაბური იყო, რასაც ორივე ფიგურანტის მძიმე დაზიანება მოჰყვა. პოლიციამ უკვე ამოიღო შემთხვევის მიმდებარედ არსებული ვიდეოკამერების ჩანაწერები, მათ შორის საზოგადოებრივი მაუწყებლის აჭარის რადიოდან.
დაპირისპირებაში მონაწილე პირები, ლადო მგალობლიშვილი და აკაკი ძნელაძე, აჭარის არალეგიტიმური მთავრობის წარმომადგენლები არიან — მგალობლიშვილი კულტურის მინისტრის მოადგილეა, ხოლო ძნელაძე განათლების მინისტრის მოადგილე იყო. ფიზიკური დაპირისპირების შემდეგ, ძნელაძე თანამდებობიდან გაათავისუფლეს.
აკაკი ძნელაძეს შესაძლოა თავდასხმის ბრალდება წაუყენონ, რადგან ეს უკანასკნელი სახელდება ინციდენტის ინიციატორად.
