საქსტატის ცნობით, 2025 წლის პირველ კვარტალში შიდა ტურიზმის კლების ტენდენცია დაფიქსირდა. ოფიციალური მონაცემებით, 15 წლის და უფროსი ასაკის საქართველოს რეზიდენტი ვიზიტორების საშუალო თვიური რაოდენობა 1 262.4 ათასით განისაზღვრა, რაც 1.2 პროცენტით ნაკლებია წინა წლის ანალოგიური პერიოდის მაჩვენებელზე. ამავე პერიოდში ვიზიტორების მიერ განხორციელებული ვიზიტების საშუალო თვიური რაოდენობა 1 506.8 ათასი იყო, რაც 3.1 პროცენტით არის შემცირებული.
ტურისტული ტიპის ვიზიტების რაოდენობაც შემცირებულია. 2025 წლის პირველ კვარტალში საქართველოს რეზიდენტი ვიზიტორების მიერ ქვეყნის ტერიტორიაზე განხორციელებული ტურისტული ვიზიტების საშუალო თვიური რაოდენობა 623.6 ათასი იყო, რაც 2024 წლის ანალოგიურ პერიოდთან შედარებით 9.4 პროცენტით ნაკლებია.
ვიზიტორების ყველაზე დიდი წილი — 36 პროცენტი — 31-50 წლამდე ასაკობრივ ჯგუფს მიეკუთვნება. ამავე პერიოდში, ვიზიტორების 55 პროცენტი ქალია. ყველაზე მეტი ვიზიტორი ცხოვრობს თბილისში — 35.6 პროცენტი, შემდეგ მოდის იმერეთის, რაჭა-ლეჩხუმისა და ქვემო სვანეთის რეგიონი 15.6 პროცენტით, ხოლო აჭარისა და ქვემო ქართლის წილი 9.1 პროცენტს შეადგენს. სხვა რეგიონები შედარებით დაბალი წილით არიან წარმოდგენილი.
რაც შეეხება ყველაზე ხშირად მონახულებულ რეგიონებს, ლიდერობს თბილისი, სადაც თვეში საშუალოდ 378.2 ათასი ვიზიტი ხორციელდებოდა. მეორე ადგილზე იმერეთის რეგიონია, თვეში საშუალოდ 328.4 ათასი ვიზიტით.
მნიშვნელოვნად შემცირდა ვიზიტებისას გაწეული ხარჯებიც. შიდა ტურისტული ვიზიტებისას თვეში საშუალოდ 242.4 მილიონი ლარი დაიხარჯა, რაც 8.8 პროცენტით ნაკლებია წინა წლის ანალოგიურ პერიოდთან შედარებით. ერთ ვიზიტზე საშუალო ხარჯი 160.8 ლარით განისაზღვრა და წინა წელთან შედარებით 5.9 პროცენტით არის შემცირებული.
აღნიშნული მონაცემები მიუთითებს, რომ შიდა ტურისტულ აქტივობასა და ხარჯვის დონეში კლებაა, რაც, სავარაუდოდ, ქვეყნის სოციალურ-ეკონომიკური მდგომარეობით და მომხმარებელთა გადახდისუნარიანობის შემცირებით არის გამოწვეული.
