ბათუმის მერისა და აჭარის მთავრობასთან მორიგი საპროტესტო აქცია გაიმართა. სხვადასხვა სოციალური პრობლემის მქონე მოქალაქეებმა თავიანთი მოთხოვნები კიდევ ერთხელ გაახმოვანეს და მთავრობის ყურადღება ითხოვეს.
იპოთეკით დაზარალებულებს, უსახლკაროებსა და ეკომიგრანტებს აჭარის ხელისუფლებიდან არავინ გამოხმაურებია. აქციაზე შეკრებილები საქართველოს მთავრობის მიერ დაანონსებულ უსახლკაროებისთვის ბინების გადაცემის პროგრამას უნდობლობას უცხადებენ. მიაჩნიათ, რომ ეს მორიგი ცრუ დაპირებაა, რასაც “ოცნების” ხელისუფლება არ შეასრულებს.
“არ შეიძლება ოჯახი იყოს სახლის გარეშე. ხელისუფლებამ დაანონსა პროგრამით 1000 ოჯახის დაკმაყოფილება, რაც არასაკმარისია. მხოლოდ აჭარაში 5 ათასზე მეტი უსახლკაროა,” – აცხადებს “ფუხარას ხმის” ხელმძღვანელი მერაბ ბლადაძე.
“ქვეყანაში უამრავი ადამიანია გამოსახლებული და რიგშია ძალიან ბევრი. ჩვენ ვიბრძოლებთ მანამ, ვიდრე მთავრობას არ ვაიძულებთ ჩვენთან შეხვედრას. როდემდე უნდა გაგრძელდეს ეს იგნორი? თითქოს ჩვენ არ ვარსებობთ. იმ კრიტერიუმებით, რომლებიც ხელისუფლებამ გამოაქვეყნა ბევრისთვის საცხოვრისი ხელმიუწვდომელი იქნება,” – ამბობს უფლებადამცველი თამაზ ბაკურიძე.
