ქობულეთში, ე.წ. მტს-ის დასახლებაში, საფეხბურთო ტექნიკური ცენტრისა და ხელოვნურსაფარიანი სტადიონის მშენებლობა იგეგმება. პროექტისთვის 5 მილიონი ლარია გამოყოფილი, შესაბამისი ტენდერი კი „საქართველოს მუნიციპალური განვითარების ფონდმა“ გამოაცხადა.
საპროექტო ტერიტორიის ფართობი 3 ჰექტარზე მეტია, მიწის ნაკვეთი კი ამ ეტაპზე აჭარის ავტონომიური რესპუბლიკის საკუთრებაშია. თუმცა, ადგილობრივების ნაწილი აცხადებს, რომ პროექტისთვის შერჩეული ტერიტორია მათ საკუთრებას წარმოადგენს. 7 ოჯახის მტკიცებით, მათ აქვთ საარქივო დოკუმენტაცია, რომლითაც, მათი თქმით, დაადასტურებენ, რომ დაახლოებით 3 ჰექტარი მიწის ნაკვეთი მათ წინაპრებს ეკუთვნოდათ.
ადგილობრივები ამბობენ, რომ მამაპაპისეული მიწის რეგისტრაციას წინა ხელისუფლების პერიოდიდან ცდილობენ, თუმცა მათი მოთხოვნა წლების განმავლობაში არ დაკმაყოფილდა. მათი თქმით, შესაბამისი დოკუმენტაცია არაერთხელ წარადგინეს, თუმცა საკითხი დღემდე განხილვის პროცესშია.
მათი განცხადებით, გასულ წელს ქობულეთის მერიაში აღნიშნული ტერიტორიის საინვესტიციოდ მომზადების წინადადებაც წარადგინეს. როგორც ადგილობრივები ამბობენ, სწორედ ამის შემდეგ გააქტიურდა ტერიტორიის საკითხი და საკუთრების უფლების აღიარების ნაცვლად, მიწაზე სპორტული ინფრასტრუქტურის მოწყობის გადაწყვეტილება მიიღეს.
ადგილობრივები ყურადღებას ამახვილებენ იმ გარემოებაზეც, რომ ტერიტორია, სადაც სპორტული კომპლექსის მშენებლობა იგეგმება, დეპუტატ გია ჭყონიას ბიზნესის მიმდებარედ მდებარეობს. მათი თქმით, საპროექტო ტერიტორიის მომიჯნავედ ჭყონიას სასტუმრო და ვენახებია. ადგილობრივები ვარაუდობენ, რომ ბიზნესმენს შესაძლოა არ სურდეს მის საკუთრებასთან ახლოს სხვა საინვესტიციო პროექტის განხორციელება, რომელიც მომავალში მის ბიზნესს კონკურენციას გაუწევს. მათი მოსაზრებით, რადგან გია ჭყონია ხელისუფლების წარმომადგენელია, შესაძლოა საკუთარი გავლენების გამოყენებით ცდილობდეს, მომიჯნავე ტერიტორიაზე ისეთი ინფრასტრუქტურა მოეწყოს, რომელიც კომერციული ინვესტიციის განხორციელებას გამორიცხავს ან შეზღუდავს.
ადგილობრივები ამ ვარაუდს სწორედ ტერიტორიის მდებარეობასა და დაგეგმილი პროექტის ხასიათს უკავშირებენ. მათი თქმით, მათთვის გაუგებარია, რატომ გადაწყდა კონკრეტულად ამ ტერიტორიაზე სპორტული ინფრასტრუქტურის მოწყობა მაშინ, როდესაც, მათი განცხადებით, თავად ჰქონდათ ტერიტორიის საინვესტიციოდ გამოყენების ინტერესი.
ადგილობრივებს კიდევ ერთი კითხვა აქვთ, რატომ იგეგმება ახალი სპორტული კომპლექსის მშენებლობა იმ ტერიტორიაზე, რომლის საიახლოვესაც, მათი თქმით, უკვე არსებობს მოქმედი სპორტული ბაზა. თუმცა მისი განვითარება და განახლება წლებია არ მომხდარა. ადგილობრივებისთვის გაუგებარია, რატომ გახდა ახალი, 5-მილიონიანი სპორტული კომპლექსის მშენებლობა საჭირო მაშინ, როდესაც, მათი შეფასებით, შესაძლებელი იყო არსებული სპორტული ბაზის რეაბილიტაცია, განახლება და განვითარება.
აღნიშნული ბრალდებები და ვარაუდები ადგილობრივების პოზიციას წარმოადგენს. მტკიცებულებები ამ ეტაპზე, საჯაროდ ვერ წარმოგვიდგინეს.
თუ „ქართული ოცნების“ დეპუტატი, გია ჭყონია აღნიშნულ საკითხზე პოზიციის დაფიქსირებას მოისურვებს „აჭარა თაიმსი“ მზად არის, მისი კომენტარი შემოგთავაზოთ.
ადგილობრივებმა დღეს ტერიტორიაზე გამაფრთხილებელი აქცია გამართეს. ისინი აჭარის ავტონომიური რესპუბლიკის მთავრობას საკითხით დაინტერესებისკენ მოუწოდებენ და აცხადებენ, რომ მოთხოვნის უგულებელყოფის შემთხვევაში სამართლებრივ ბრძოლას დაიწყებენ.
„აჭარა თაიმსი“ კომენტარისთვის აჭარის მთავრობასა და ქობულეთის მერიას დაუკავშირდა. უწყებებში საკითხზე განმარტება არ გაკეთა.
ნახეთ, დეპუტატ გია ჭყონიასთან დაკავშირებული თემები ⇓
ვინ არის “ოცნების” დელეგატად მივლენილი გიორგი ჭყონია – ბიზნესმენი, კომფორტულად ორ ხელისუფლებასთან
იუსტიციის სამინისტრომ ფართი „ოცნების” შემწირველი გიორგი ჭყონიას კომპანიისგან იქირავა
დელეგატები აჭარიდან – რა ვიცით კანდიდატებზე
სარფიდან ლაგოდეხამდე – TIR PARK-ების ნაწილი მმართველ პარტიასთან დაკავშირებულ პირებს უკავშირდება
დეპუტატი და ბიზნესმენი გიორგი ჭყონია შპს „გზას“ ასხვისებს
კორუფციის მზარდი ფაქტები აჭარაში და მათზე რეაგირების პრობლემა – რა დაადგინა მესამე სექტორის კვლევამ
დელეგატები ნეპოტიზმითა და უკონკურენტოდ ტენდერების მოგებით გამდიდრდნენ – ენმ
