ფოტო: ედო მჟავანაძე
„აჭარა თაიმსის“ დამფუძნებელი და დირექტორი, ჟურნალისტი, რომელიც „ოცნების ქალაქში“ მიმდინარე ტრაგედიას აშუქებდა, რამდენიმე თავდასხმისა და აგრესიული ქმედების სამიზნე გახდა. ამ ფონზე, მედიასაშუალების წარმომადგენელი, სულხან მესხიძე სპეციალურ საგამოძიებო სამსახურს მიმართავს სამართლებრივი გამოძიების დაწყების მოთხოვნით.
ჟურნალისტი აღნიშნავს, რომ ადგილზე მომხდარი ინციდენტები ეწინააღმდეგება ჟურნალისტური თავისუფლების დაცვის პრინციპებს და მოითხოვს შესაბამის რეაგირებას.
„როგორც თქვენთვის ცნობილია, 15 თებერვალს, როცა „აჭარა თაიმსი“ ოცნების დასახლებაში მომხდარ ტრაგედიას აშუქებდა, ჩემს პროფესიულ საქმიანობაში არაერთი დაბრკოლება შემექმნა. ადგილზე მყოფი მოქალაქეების ნაწილი, ასევე, „ქართული ოცნების“ მხარდამჭერები და მათ შორის ბათუმის ბულვარის თანამშრომელი დანიელ თურაძე, აგრესიას გამოხატავდნენ ჩემ მიმართ. ისინი ხელს მიშლიდნენ მუშაობაში, ცდილობდნენ ტექნიკის დაზიანებას და მავიწროებდნენ.
საზოგადოებისთვის ნათელია, რომ ეს არ იყო მხოლოდ სპონტანური აგრესია – ეს იყო მიზანმიმართული მცდელობა, რომ მედიას არ ჰქონოდა საშუალება, მომხდარი მოვლენები ობიექტურად გაეშუქებინა. კიდევ უფრო შემაშფოთებელია ის, რომ ადგილზე მყოფი პოლიციელები, რომლებიც ვალდებულნი იყვნენ დაეცვათ ჟურნალისტის უსაფრთხოება, არანაირ რეაგირებას არ ახორციელებდნენ. დანაშაულის ერთ-ერთი ეპიზოდის თვითმხილველები იყვნენ ჩინოვნიკებიც. კერძოდ, ბათუმის საკრებულოს დეპუტატები, თავმჯდომარე – ირაკლი თავდგირიძე, ასევე, უმაღლესი საბჭოს დეპუტატი რამაზ ჯინჭარაძე, რომლებსაც ფაქტზე რეაქცია არ ჰქონიათ, რაც მიჩენს ლეგიტიმურ ეჭვს, რომ პროცესი მართულია “ქართული ოცნების” მიერ.
დღემდე გრძელდება სოციალური ქსელებით ჩემს წინააღმდეგ მუქარისა და სიძულვილის ენით გაჯერებული ტექსტები გავრცელება, მათ შორის საჯარო მოხელეების მხრიდან. ცხადია ჟურნალისტური საქმიანობის ხელშეშლა მხოლოდ ფიზიკური აგრესიით არ შემოიფარგლება. დღეს, 19 მარტს, ოფიციალურად მივმართე სპეციალურ საგამოძიებო სამსახურს, რადგან უწყებას საჯაროდ გავრცელებულ კადრებზე დღემდე რეაგირება არ მოუხდენია. მოვითხოვ, რომ ყველა აღნიშნული ფაქტი დეტალურად იქნას შესწავლილი და პასუხისმგებელი პირები კანონის წინაშე წარდგნენ. მე არ ვაპირებ შევეგუო ჟურნალისტების შევიწროებას და შევშინდე მუქარის გამო. მიუხედავად ნებისმიერი ზეწოლისა. სიმართლის თქმა ჩემი პროფესიული და ეთიკური ვალდებულებაა და ვერავინ მაიძულებს, გავჩუმდე,” – სულხან მესხიძე, ონლაინ მედია “აჭარა თაიმსის” დამფუძნებელი და დირექტორი.
მსგავსი თემები:
„ქართული ოცნება“ ჟურნალისტების დისკრედიტაციით და მათგან მტრის ხატის შექმნითაა დაკავებული – ქარტია
