პარლამენტის პლენარულ სხდომაზე განიხილეს კანონპროექტი, რომელიც უცხო ქვეყნის მოქალაქე მსჯავრდებულებისთვის სასჯელის მოუხდელი ნაწილის ქვეყნიდან გაძევებით შეცვლის შესაძლებლობას ითვალისწინებს.
განხილვისას დეპუტატმა ვლადიმერ ბოჟაძემ იკითხა, შეიძლება თუ არა ახალი რეგულაცია შეეხოს საქართველოს მესამე პრეზიდენტ მიხეილ სააკაშვილს, რომელიც უკრაინის მოქალაქეა და რომლის წინააღმდეგაც სხვადასხვა სამართლებრივი პროცესი მიმდინარეობს. ბოჟაძის განცხადებით, საზოგადოებისთვის მნიშვნელოვანია იცოდეს, ხომ არ უკავშირდება საკანონმდებლო ცვლილება კონკრეტულად სააკაშვილის შესაძლო გათავისუფლების საკითხს.
კანონპროექტის მომხსენებელმა ალექსანდრე დარახველიძემ განმარტა, რომ ცვლილებები კონკრეტულ პირზე არ არის მორგებული და იმოქმედებს ყველა იმ უცხოელ მსჯავრდებულზე, რომელიც კანონით განსაზღვრულ პირობებს დააკმაყოფილებს.
მისი თქმით, გადაწყვეტილების მიღებისას გათვალისწინებული იქნება მსჯავრდებულის პიროვნული მახასიათებლები, ჩადენილი დანაშაულის სიმძიმე და მოტივი, შედეგები, დაწესებულებაში ქცევა, წარსული ნასამართლობა და სხვა გარემოებები.
დარახველიძის განმარტებით, თუ კონკრეტული პირის მიმართ საბოლოო სასჯელი დადგენილი არ არის ან სხვა სამართლებრივი პროცესი გრძელდება, შეღავათის მექანიზმის გამოყენება ვერ მოხდება.
ამასთან, მისი თქმით, უცხოელი მსჯავრდებულების შემთხვევაში საბჭოსთვის განცხადებით მიმართვა სავალდებულო არ იქნება — კანონით განსაზღვრული ვადის მოხდის შემდეგ მათი საქმეები ავტომატურად განიხილება. მისივე განმარტებით, ქვეყნიდან გაძევება არ განხორციელდება იმ შემთხვევაში, თუ მსჯავრდებულის წარმოშობის ქვეყანაში არსებობს წამების ან არასათანადო მოპყრობის რისკი.
მიხეილ სააკაშვილი კლინიკა „ვივამედიდან“ პენიტენციურ დაწესებულებაში დააბრუნეს
სტრასბურგის სასამართლომ მიხეილ სააკაშვილის სარჩელი არ დააკმაყოფილა
პროკურატურამ რიგი ოპოზიციური ლიდერების წინააღმდეგ სისხლის სამართლებრივი დევნა დაიწყო
