ძვირფასო მეგობრებო და მხარდამჭერებო – დღეს განსაკუთრებული დღეა, აჭარა თაიმსის პირველი იუბილე. ეს ერთი წელი იყო სირთულეებით, შრომითა და დიდი ემოციებით სავსე, მაგრამ კიდევ უფრო მეტი იყო სიხარული, გამარჯვება და იმედის გამართლება. ყველაფერი ნულიდან დავიწყე. ნული ბიუჯეტით, მაგრამ უდიდესი რწმენით – რომ გამოვიდოდა და შეიქმნებოდა პლატფორმა, რომელიც არამხოლოდ საინფორმაციო სივრცეს გაამდიდრებდა, არამედ იქცეოდა სანდო და ობიექტური მედიის მაგალითად.
» ეს წელი იყო ჩვენი და თქვენი დიდი მხარდაჭერისშედეგი, რაც ციფრებში და მიღწევებში აისახა:
- დაფუძნებიდან სამი თვის თავზე მოვიპოვეთ გრანტი, რომელიც საშუალებას გვაძლევს განვახორციელოთ მნიშვნელოვანი აქტივობები;
- ჩვენი ჟურნალისტური ნაშრომები არაერთი კონკურის გამარჯვებული გახდა;
- კონტაქტი დავამყარეთ ახალ პარტნიორებთან, რომლებთან ერთადაც ვაშენებთ მყარ საფუძვლებს;
- ვიპოვეთ სპონსორები, რომლებიც გვეხმარებიან მეტი შესაძლებლობის შექმნაში;
- თითქმის ყველა საჭირო ტექნიკური აღჭურვილობა მოვიპოვეთ;
- ჩვენი აუდიტორია ყოველდღიურად იზრდება ყველა პლატფორმაზე, რაც გვაძლევს მოტივაციას ვაკეთოთ კიდევ უფრო მეტი.
აჭარა თაიმსი გახდა სანდო ინფორმაციის წყარო აჭარიდან. ჩვენ ვიყავით არაერთი გახმაურებული მასალის ავტორი, რომლებიც დღის წესრიგს ქმნიდნენ და რეალურ გავლენას ახდენდნენ საზოგადოებაზე. რაც ყველაზე მნიშვნელოვანია, პირველი წლისთვის დასახული ყველა მიზანი არა მხოლოდ შევასრულეთ, არამედ გადავაჭარბეთ კიდეც საკუთარ მოლოდინებს.
» ჩვენი მუშაობის მთავარი ღირებულება არის საზოგადოების ინტერესების დაცვა:
- ჩვენ ვეწინააღმდეგებით რუსულ პროპაგანდას და აქტიურად ვუჭერთ მხარს დასავლურ ღირებულებებს;
- მიუხედავად მცირე რესურსებისა, ვახერხებთ, რომ აჭარიდან ყველა მნიშვნელოვანი მოვლენა ოპერატიულად და ობიექტურად გავაცნოთ მკითხველებს;
- აქტიურად ვაშუქებთ ხალხის საჭიროებებს, მათ შორის ყველა საპროტესტო აქციებს უწყვეტად, პირდაპირ ეთერში გადავცემთ.
ჩვენი წარმატება არ იქნებოდა შესაძლებელი თქვენი მხარდაჭერის გარეშე. გულმხურვალე მხარდამჭერები, ინფორმაციის მომწოდებლები და თავდაუზოგავი მოხალისეები არიან ჩვენი მთავარი ძალა. ამ ერთი წლის განმავლობაში მივიღეთ ფასდაუდებელი გამოცდილება და ახლა კიდევ უფრო ძლიერი და თავდაჯერებული ვგეგმავთ მომავალს.
» ჩვენს სამომავლო გეგმებს შორისაა:
- ახალი ინიციატივების განხორციელება;
- სტრატეგიული პროექტების განვითარება, რომლებიც პირდაპირ პასუხობს საზოგადოების საჭიროებებს;
- კიდევ უფრო მეტი პლატფორმის გაძლიერება, რომ თქვენს გვერდით ვიყოთ, სადაც არ უნდა იყოთ.
აჭარა თაიმსი მუდამ იქნება საზოგადოებისა და სიმართლის მხარეს. ჩვენ შევქმნით სივრცეს, სადაც ყველა მნიშვნელოვანი ხმა გაისმება. გახსოვდეთ, ჩვენ მხოლოდ თქვენს დამსახურებად მივიჩნევთ ყველაფერს, რაც აქამდე შევძელით, და ჩვენი თითოეული ნაბიჯი მომავალში კვლავაც თქვენ გეძღვნებათ. დიდი მადლობა თითოეულ თქვენგანს ამ დაუვიწყარი ერთწლიანი გზისთვის. ეს მხოლოდ დასაწყისია – ერთად უფრო შორს წავალთ!
აქვე დაგაინტერესებთ: აჭარა თაიმსი ციფრებში ასე გამოიყურება ⇓
- Facebook: 15 ათასი გამომწერი
- ფეისბუქ ჯგუფები: 25 ათასი გამომწერი
- Tik-Tok: 17 ათასი გამომწერი
- Youtube: 373 გამომწერი
- Instagram: 145 გამომწერი
- Telegram: 410 გამომწერი
- WhatApp: 100 გამომწერი
ცნობისთვის: ვებგვერდზე: AJARATIMES.GE-ზე ყოველდღიურად 10 ათასამდე უნიკალური ვიზიტორი ფიქსირდება. სოციალურ ქსელებში ჩვენი მასალების ნახვების რაოდენობა, თვიურად 3 მილიონს აღემატება.
სიყვარულითა და მადლიერებით სულხან მესხიძე, „აჭარა თაიმსის“ დამფუძნებელი.
