სახელმწიფო უსაფრთხოების სამსახური აჭარის უმაღლესი საბჭოს აპარატის ყოფილი თანამშრომლის წინააღმდეგ დაწყებული გამოძიების დეტალებს ავრცელებს. უწყების ცნობით, პირი ქრთამის აღების ბრალდებით უკვე პასუხისგებაშია მიცემული.
სუს-ის ანტიკორუფციული სააგენტოს დირექტორის, ემზარ გაგნიძის განცხადებით, ყოფილი თანამშრომელი მოქალაქეს ქობულეთში, დავით აღმაშენებლისა და თამარ მეფის ქუჩების მიმდებარედ მდებარე სახელმწიფოს საკუთრებაში არსებულ ორ მიწის ნაკვეთზე იჯარის გაფორმების სანაცვლოდ 3 000 ლარს სთხოვდა. გამომძიებლების ცნობით, მან აღნიშნული თანხიდან ეტაპობრივად 2 000 ლარი უკვე მიიღო.
გაგნიძე აღნიშნავს, რომ საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც თავისუფლების აღკვეთას 6-დან 9 წლამდე ვადით ითვალისწინებს.
