მიუხედავად საპროცესო შეთანხმების მოთხოვნისა, ზურაბ ჭავჭანიძეს, თბილისის საქალაქო სასამართლომ 5 წლით პატიმრობა მიუსაჯა.
„მე სოხუმელი ვარ. 15 ადამიანი, ვისთან ერთადაც ვიზრდებოდი, ომში დაიღუპა, იმისთვის რომ ერთიან საქართველოში გვეცხოვრა. მათი სულებიც არ მაძლევს იმის საშუალებას, რომ გავჩერდე. ერთადერთი, რაც გამაჩნია, პატიოსანი ადამიანის სახელია. ყველა რუსი მმართველის ოცნებაა – საქართველო ქართველების გარეშე. თაობა არ აღზრდილა საქართველოში, თავისუფლებისთვის ბრძოლა რომ არ უწევდეს. ჩემი მთელი ცხოვრება იმის ქადაგებაა, რომ სიყვარული უპირველეს ყოვლისა. ენას ძვალი არ აქვს, მაგრამ არ მგონია, ჩემზე ვინმემ თქვას, რომ ბოროტმოქმედი ვარ. აქ ყველა ჩვენი სამშობლოს პატრიოტები ვსხედვართ. პატიოსანი ხალხი შეგვარჩიეს, რომლებსაც არანაირი დანაშაული არ გვაქვს – უბრალოდ უადგილო ადგილზე მოვხვდით უადგილო სიტუაციაში. 4 ოქტომბერს მშვიდობიან აქციაზე მოვედით, მათ შორის, ბევრი ბავშვებთან ერთად. არანაირი ბოროტული განზრახვა არ გვქონია. მე ვიცი, რომ აქ ყველა უდანაშაულო ადამიანები ვართ. ყველამ მაპატიეთ, მაგრამ საპროცესო შეთანხმებაზე თხოვნა გავგზავნე. ყველაზე დიდი ფასი ჩემთვის თავისუფლებას აქვს,“ – თქვა ბრალდებულმა ზურა ჭავჭანიძემ სასამართლო პროცესზე.
„ბრალდების მხარე არაერთხელ აცხადებდა, რომ საპროცესო შეთანხმებასთან დაკავშირებით მოლაპარაკებების წარმოება განხორციელდებოდა იმ პირებთან, რომლებიც აღიარებდნენ ჩადენილ დანაშაულს. ვინაიდან თავისი არსით საპროცესო შეთანხმება მოიცავს, რომ პირი აღიარებს ჩადენილ დანაშაულს, ინანიებს. ამ შემთხვევაში, ზურაბ ჭავჭავაძის არც თავის განცხადებაში და არც დღეს, სასამართლო პროცესზე გაჟღერებულ პოზიციაში, მისი მხრიდან ბრალად წარდგენილი ქმედების აღიარება არ განხორციელებულა. შესაბამისად, ამ მოცემულობით, რა თქმა უნდა, ბრალდების მხარე საპროცესო შეთანხმებას არ აფორმებს. მოლაპარაკება არასოდეს არც კი იწყება ბრალდების მხარის მიერ პირებთან, როდესაც მათი მხრიდან არ არის აღიარება. მოგეხსენებათ, რომ საპროცესო შეთანხმების გაფორმების დროს, მათ შორის სასამართლო განიხილავს აღიარება ნებაყოფლობითი იყო თუ არა,“ – განაცხადა პროკურორმა თამარ იაკობიძემ ჟურნალისტებთან საუბრისას.
ნახეთ, ზურას შესახებ მომზადებული სიუჟეტი „აჭარა თაიმსის“ არქივიდან ⇓
ზურაბ ჭავჭანიძე – გაგაცნობთ ბათუმის საპროტესტო აქციების კიდევ ერთ მედროშეს
