შინაგან საქმეთა სამინისტროს ინფორმაციით, ბათუმში სამართალდამცველებმა საგამოძიებო მოქმედებების შედეგად დანაშაულებრივი ჯგუფის 6 წევრი დააკავეს.
დაკავებულები არიან თურქეთის რესპუბლიკის მოქალაქეები: 2003 წელს დაბადებული მ.ჯ., 2001 წელს დაბადებული დ.ბ., 2002 წელს დაბადებული ქ.უ., 2005 წელს დაბადებულები ი.ო. და ჯ.ჯ., ასევე უზბეკეთის მოქალაქე – 1984 წელს დაბადებული ნ.ჰ.
გამოძიებით დადგინდა, რომ ერთ-ერთ ბრალდებულს, მ.ჯ.-სა და თურქეთის რესპუბლიკის მოქალაქეს, 1989 წელს დაბადებულ ე.ი.-ს შორის კონფლიქტი მოხდა. მოგვიანებით, მ.ჯ.-მ და დანაშაულში თანამონაწილე პირებმა ე.ი. ბათუმში მდებარე სასტუმროში ძალით მიიყვანეს, ფიზიკურად გაუსწორდნენ და ცეცხლსასროლი იარაღის დემონსტრირებით, სიცოცხლის მოსპობის მუქარით, 10 000 დოლარის გამოძალვა სცადეს.
გამოძიების მტკიცებით, ჯგუფმა ინსცენირება მოაწყო და ნ.ჰ.-ს დახმარებით ე.ი.-ს დაემუქრა, რომ თუკი სამართალდამცველებს მიმართავდა, მას ცრუ ჩვენებით და ქალზე განხორციელებულ ძალადობაში დაადანაშაულებდნენ.
დანაშაულის შემსწრე გახდა ჯ.ჯ., თუმცა მან მომხდარის შესახებ სამართალდამცავ ორგანოებს არ შეატყობინა. ი.ო.-ს პირადი ჩხრეკისას სამართალდამცველებმა ამოიღეს ცეცხლსასროლი იარაღი და ხუთი ვაზნა.
გამოძიება საქართველოს სისხლის სამართლის კოდექსის რამდენიმე მუხლით მიმდინარეობს, მათ შორის: 181-ე მუხლი (გამოძალვა), 143-ე მუხლი (თავისუფლების უკანონო აღკვეთა), 236-ე მუხლი (იარაღის უკანონო შეძენა-შენახვა) და 376-ე მუხლი (დანაშაულის შეუტყობინებლობა).
დანაშაულები 10 წლამდე თავისუფლების აღკვეთას ითვალისწინებს.
