ბათუმში დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ბრალდებით ორი პირი – 1994 წელს დაბადებული, წარსულში ნასამართლევი გ.ხ. და ყაზახეთის მოქალაქე, 1985 წელს დაბადებული ა.ვ. – დააკავეს.
შსს ინფორმაციით, გ.ხ.-ის პირადი და საცხოვრებელი სახლის ჩხრეკისას ამოღებულია სარეალიზაციოდ გამზადებული 10.47 გრამი „მეთადონი“, 40 გრამი გამომშრალი „მარიხუანა“, ასევე ნარკოტიკული საშუალებების დაფასოებისთვის საჭირო მასალები – წებოვანი ლენტები და ელექტრო სასწორი.
გამოძიების მტკიცებით, გ.ხ.-ს „მეთადონს“ გასაყიდად ყაზახეთის მოქალაქე ა.ვ. აწვდიდა. მის საცხოვრებელ სახლშიც ჩატარდა ჩხრეკა, რა დროსაც პოლიციამ დამატებით 43 გრამი „მეთადონი“ ამოიღო.
ორივე პირი დაკავებულია და ბრალდებულის სტატუსით იმყოფება.
დანაშაულები საქართველოს სისხლის სამართლის კოდექსის 260-ე და 260-ე პრიმა მუხლებით არის შეწყობილი, რაც 20 წლამდე ან უვადო თავისუფლების აღკვეთას ითვალისწინებს.
