“ბოდიში და გადამგზავნ ორგანოდ ნუ ვიქცევით” – ასე მიმართა აჭარის უმაღლესი საბჭოს თავმჯდომარეს ბიუროს სხდომაზე, დეპუტატმა დავით ბაციკაძემ. ეს უკანასკნელი ამ კომენტარით საბჭოს გადაწყვეტილებას გამოეხმაურა, რომლის მიხედვითაც წარმომადგენლობით ორგანოში დარეგისტრირებული პეტიცია ბათუმის მერიას გადაეგზავნა, რაც პირველი შემთხვევა არ ყოფილა.
“ამ მხრივ რაღაც დასახვეწი გვაქვს, საფიქრალი იმიტომ, რომ… რაღაც ჩარჩო უნდა არსებობდეს, რაც კომპეტენციებს თავიდანვე განსაზღვრავს. თითქმის ყველა პეტიცია ამდაგვარი იყო და მოგვიწია გამტარი ფუნქციის შესრულება. სამუშაო გვაქვს ამ კუთხით და ვიფიქროთ,” – აღნიშნა ბიუროს სხდომაზე დავით ბაციკაძემ.
“აქ კომპეტენციების საკითხია,” – თავის მხრივ ასე უპასუხა რეპლიკას უმაღლესი საბჭოს თავმჯდომარემ. დავით გაბაიძეს სხდომაზე დამატებით განმარტება არ გაუკეთებია. დეპუტატებმა პეტიციის ბათუმის მერიისთვის გადაგზავნას მხარი ერთხმად დაუჭირეს.
“კონსტიტუციისა და კანონმდებლობის თანახმად, ნებისმიერ სახელისუფლებო ორგანოს გააჩნია თავისი კომპეტენცია, აქედან გამომდინარე უმაღლესი საბჭოს საქმიანობის არეალიც განსაზღვრულია. საბჭოში წარმოდგენილი პეტიციების უმრავლესობა წარმოადგენს სხვა ორგანოს კომპეტენციას. შექმნილი პრაქტიკის გამო, ჩვენ გვიწევს გადამისამართება. რამდენიმე პეტიციას მივყევით ბოლომდე და ჩვენი ზედამხედველობის ქვეშ მოხდა მისი განხილვა და გადაწყვეტილების მიღება.
ალბათ, ყველას კიდევ მეტი სამუშაო გვაქვს, რომ მოსახლეობას განვუმარტოთ ჩვენი კომპეტენცია. ეს არ არის მარტივი თემა, ხშირად იურისტებსაც უჭირს ამ საკითხების გარჩევა ერთმანეთისგან. გამომდინარე აქედან, რიგითი მოქალაქეც თუ არ იქნება საქმეში ჩახედული არ მიკვირს. შემდეგისთვის კიდევ უფრო დავკონკრეტდებით და განვმარტავთ რა შემთხვევაში შეუძლიათ მომართვა,” – განაცხადა “აჭარა თაიმსთან” საუბრისას დავით გაბაიძემ.
ინფორმაციისთვის: აჭარის უმაღლესს საბჭოს პეტიციით ალექსანდრე აბუსელიძემ მიმართა. სტუდენტი ქალაქის ეკოლოგიური და სატრანსპორტო პოლიტიკის გაუმჯობესების მიზნით, ბათუმში, ყოველი თვის ბოლო შაბათის, ველო დღედ გამოცხადებს ითხოვს.
ცნობისთვის, 2023 წელს უმაღლესს საბჭოში პეტიცია არ დარეგისტრირებულა. ამ თემაზე “აჭარა თაიმსის” მასალას შეგიძლიათ გაეცნოთ ბმულზე.
აქვე დაგაინტერესებთ: რატომ ვერ შეძლო ბათუმის მერიამ გამარჯვებული პროექტების განხორციელება – მივიწყებული „შენი იდეა ბათუმს“
