გონიო-კვარიათის აკვატორიაში სავარაუდოდ, საზღვაო ნაღმი ტივტივებს, ამის შესახებ ინფორმაცია “აჭარა თაიმსს” მეთევზეებმა მიაწოდეს. მათი თქმით, დღეს დილით, ზღვაში გაურკვეველი სახის ნივთი შენიშნეს.
“ამ დილით, საპის დაფით ცურაობისას, გონიო-კვარიათის სანაპირო წყლების ზონაში შევნიშნე მოდრეიფე რკინის ტივტივა. არ არის გამორიცხული, რომ ის იყოს საზღვაო ნაღმი. დღეს ზედაპირული დინება ბათუმის მხარეს იყო, მაგრამ ჩემდა გასაკვირად რკინის დაჟანგული ტივტივა, დინების საწინააღმდეგოდ კვარიათი-სარფის მხარეს, ნაპირიდან მაქსიმუმ 50-80 მეტრის დაშორებით მოძრაობდა. ცოტა შორიდან მე ის პლასმასის ტივტივა ან სხვა საგანი მეგონა და მის ამოღებას ვაპირებდი, მაგრამ რადგან ის საკმაოდ სქელი რკინის ფენით იყო დაფარული, მისი ამოღებისგან თავი შევიკავე. აღნიშნული ფაქტის შესახებ უკვე განვაცხადე გონიოს სანაპიროს დაცვის სადგურში.
როგორც ვიცი მათ სანაპირო დაცვის კატარღა გამოიძახეს, მაგრამ თავად ეს მოდრეიფე რკინის საგანი სარფის მიმართულებით საკმაოდ სწრაფად მოძრაობს და თანაც ნაპირთან უკვე ძალიან ახლოს – მაქსიმუმ 50-80 მეტრშია,” – ამბობს დავით ნიკოლეიშვილი, საქართველოს წყალქვეშა ცურვის ასოციაციის თავმჯდომარე.
შინაგან საქმეთა სამინისტროში გვითხრეს, რომ შეტყობინების საფუძველზე დაკვირვება მიმდინარეობს.
