საქართველოს ფინანსთა სამინისტროს საგამოძიებო სამსახურის ინფორმაციით, ბათუმში შესაბამისი ნებართვის გარეშე სამეწარმეო საქმიანობის განხორციელების ფაქტი გამოავლინეს. სამართალდამცველებმა ერთი პირი დააკავეს, ხოლო მეორე პირის მიმართ სისხლისსამართლებრივი დევნა დაუსწრებლად დაიწყო.
უწყების ცნობით, საგამოძიებო მოქმედებების შედეგად დადგინდა, რომ ბრალდებულებს შენიღბულად ჰქონდათ მოწყობილი ონლაინგათამაშების ობიექტი. აღნიშნული ობიექტიდან, შესაბამისი ნებართვის გარეშე, ინტერნეტის მეშვეობით, უცხოური ინტერნეტკაზინოების ვებგვერდებზე პირდაპირი ტრანსლაციის („სტრიმინგის“) ფორმატში გადაიცემოდა აზარტული და მომგებიანი თამაშების მიმდინარეობა.
გამოძიების ინფორმაციით, ობიექტის კანონიერად ფუნქციონირების შემთხვევაში სახელმწიფო ბიუჯეტში სანებართვო მოსაკრებლის სახით 100 000 ლარი უნდა გადახდილიყო.
ფინანსთა სამინისტროს საგამოძიებო სამსახურის განცხადებით, ამ ეტაპზე ინტენსიურად მიმდინარეობს საგამოძიებო მოქმედებები დანაშაულებრივ საქმიანობაში მონაწილე სხვა პირების გამოვლენის მიზნით.
გამოძიება საქართველოს სისხლის სამართლის კოდექსის 192-ე მუხლის მე-2 ნაწილის „ა“ ქვეპუნქტით მიმდინარეობს, რაც სასჯელის სახით 3-დან 5 წლამდე ვადით თავისუფლების აღკვეთას ითვალისწინებს.
