„დანაშაულს იმიტომ არ იძიებენ, რომ საქმეში გარეულია სულხან თამაზაშვილი“ — ზურა ელიბაშვილის ნათესავი ვიდეომიმართვით გამოძიების წარუმატებლობაზე საუბრობს. ელიბაშვილის საქმესთან დაკავშირებით გარდაცვლილის ნათესავი, ხატია გოგიძე, საჯარო ვიდეომიმართვით დანაშაულის გამოუძიებლობის მიზეზებზე ღიად საუბრობს.
გოგიძის თქმით, გამოძიება თითქმის რვა წელია უშედეგოდ მიმდინარეობს. აღსანიშნავია, რომ პროცესში ერთ-ერთი მაღალჩინოსანი — სულხან თამაზაშვილი ფუგურირებს.
„დანაშაულს იმიტომ არ იძიებენ, რომ საქმეში გარეული არის სულხან თამაზაშვილი, რომელიც ჩვენი ვარაუდით ახორციელებდა მითითებებს, რომ ზურა ელიბაშვილისთვის ნარკოტიკი ჩაედოთ და დაეჭირათ,“ — აღნიშნავს გოგიძე.
ხატია გოგიძე ასევე, ყურადღებას ამახვილებს იმ ფაქტზე, რომ მიუხედავად ადამიანის უფლებათა ევროპული სასამართლოს მიერ მიღებული გადაწყვეტილებისა, რომელსაც ელიბაშვილის საქმეში სიცოცხლის უფლების პროცედურული დარღვევა და სახელმწიფო მხრიდან ეფექტური გამოძიების ვერშესრულება დაუდგინა, პრაქტიკაში საქმე არ წასულა წინ.
“ადამიანის უფლებათა ცენტრის” ინფორმაციით, ზურა ელიბაშვილი 2016 წლის 1 აგვისტოს თბილისის აეროპორტში დედისა და ძმის დასახვედრად მიდიოდა, თუმცა ადგილამდე ვერ მივიდა. მისი ავტომობილი საჯარიმო ავტოსადგომზე იპოვეს, ხოლო თავად ელიბაშვილი — სამი დღის შემდეგ მდინარე მტკვარში გარდაცვლილი.
არასამთავრობო ორგანიზაციის ცნობით, ზურას გარდაცვალების დღეს საპატრულო პოლიციის ეკიპაჟი მისდევდა და მიუხედავად იმისა, რომ დევნის მონაწილე პირები დადგენილია, გამოძიებას შედეგი არ მოუტანია.
ინფორმაციისთვის: სტრასბურგის სასამართლომ 2023 წელს დაადგინა, რომ გამოძიება სიცოცხლის უფლების პროცესუალურ ნაწილს არღვევდა და საქართველოს სახელმწიფოს დააკისრა 12 000 ევროს ანაზღაურება.
ცნობისთვის: ცხადია, „აჭარა თაიმსი“ ამ ბრალდების პასუხად კითხვებს დაუსვამდა აჭარის მთავრობის არალეგიტიმურ თავმჯდომარეს და სულხან თამაზაშვილს კომენტარისთვის სათანადო სივრცესაც დაუთმობდა. თუმცა, როგორც ცნობილია, „ქართული ოცნების“ ხელისუფლება არ თანამშრომლობს დამოუკიდებელ და ობიექტურ მედიასთან — მათ შორის, ისინი საჯარო შეხვედრებსაც იზოლირებულ სივრცეში ატარებენ. იმ შემთხვევაში, თუ ამ მასალის გამოქვეყნების შემდეგ სულხან თამაზაშვილს სურვილი გაუჩნდება საკუთარი პოზიციის დაფიქსირების, მისი კომენტარი სრულად გამოქვეყნდება და მასალა განახლდება.
თვითგამოცხადებულმა დეპუტატებმა აჭარის მთავრობის არალეგიტიმური თავმჯდომარე აირჩიეს
