აჭარის ავტონომიური რესპუბლიკის მთავრობის თავმჯდომარის ადმინისტრაციის უფროსი თინა ზოიძე დაკავებული თანამდებობიდან გათავისუფლდა — ამის შესახებ ინფორმაცია „აჭარა თაიმსს“ მიაწოდეს.
ზოიძე თანამდებობიდან მას შემდეგ გაათავისუფლეს, რაც აჭარის მთავრობის თავმჯდომარემ თორნიკე რიჟვაძემ გადადგომის შესახებ ოფიციალურად განაცხადა.
უცნობია, უკავშირდება თუ არა ზოიძის გათავისუფლება უშუალოდ რიჟვაძის წასვლას, თუმცა გარემოებების თანხვედრა მიანიშნებს, რომ გადაწყვეტილება შესაძლოა მთავრობაში განხორციელებული საკადრო ცვლილების ნაწილი იყოს.
„აჭარა თაიმსის“ კითხვაზე — რა გახდა თანამდებობის დატოვების მიზეზი, თინა ზოიძემ შეტყობინების ნახვის მიუხედავად კითხვაზე არ გვიპასუხა. პასუხი ვერც აჭარის მთავრობის ადმინისტრაციიდან მივიღეთ, სადაც აღნიშნულ საკითხზე ოფიციალური განმარტება ჯერჯერობით არ გაკეთებულა.
